କଟକ (ବଡ଼ ଖବର ବ୍ୟୁରୋ): ରାଜ୍ୟ ସରକାର ଉତ୍ତମ ଚିକିତ୍ସା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଥିଲେ ମଧ୍ୟ ଅନେକ ସମୟରେ ରୋଗୀ ଅବହେଳା କଥା ସାମ୍ନାକୁ ଆସିଛି । ମଙ୍ଗଳବାର ବିଳମ୍ବିତ ରାତିରେ ଜଣେ ରୋଗୀଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ମେଡିକାଲ କର୍ତୃପକ୍ଷଙ୍କ ଅବହେଳା ଯୋଗୁଁ ଏଭଳି ଅଘଟଣ ଘଟିଥିବା ସୂଚନା ମିଳିଛି । ମୃତ୍ୟୁବରଣ କରିଥିବା ବ୍ୟକ୍ତି ପରମହଂସ ଗ୍ରାମ ପଞ୍ଚାୟତ ରାଜହଂସ ଗାଁ ର ଧ୍ରୁବଚରଣ ବେହେରା ତାଙ୍କ ବୟସ ୭୩ ବର୍ଷ ।
ରୋଗୀ ପ୍ରତି ଅବହେଳା ହୋଇଥିବା ପରିବାର ପକ୍ଷରୁ ଅଭିଯୋଗ କରିଛନ୍ତି । କଟକ ବଡ଼ ମେଡ଼ିକାଲ କୋଭିଡ୍ ଓ୍ବାର୍ଡରେ ଜଣେ ରୋଗୀ ପାଇଖାନାରେ ପଡି ମୃତ୍ୟୁ ହୋଇଛି । ଏହି ଅଭାବନୀୟ ଘଟଣାକୁ ନେଇ ଡାକ୍ତରଖାନାରେ ଉତ୍ତେଜନା ପ୍ରକାଶ ପାଇଛି। ସୂଚନା ଅନୁଯାୟୀ ରାଜହଂସ ଗ୍ରାମର କୋଭିଡ ସଂକ୍ରମିତ ରୋଗୀ ଧ୍ରୁବଚରଣ ବେହେରା ଚିକିତ୍ସା ପାଇଁ ଗତକାଲି କଟକ ବଡ଼ଡାକ୍ତରଖାନାରେ ଭର୍ତ୍ତି ହୋଇଥିଲେ। ସନ୍ଧ୍ୟାରେ ସେ ପରିସ୍ରା କରିବାକୁ ପାଇଖାନାକୁ ଯାଇଥିଲେ।
ସେଠାରେ ତାଙ୍କର ଗୋଡ଼ ଖସି ଯାଇଥିଲା। ଭିତରୁ କବାଟ ବନ୍ଦ ଥିବାରୁ ଦୀର୍ଘ ସମୟ ପର୍ଯ୍ୟନ୍ତ ସେ ପାଇଖାନାରେ ପଡ଼ିରହିଥିଲେ। କିନ୍ତୁ ତାଙ୍କୁ କେହି ଖୋଜାଖୋଜି କରିନଥିଲେ । ପରେ ତାଙ୍କ ପୁଅ ପାଇଖାନା ଭିତରୁ ତାଙ୍କୁ ଉଦ୍ଧାର କରିଥିଲେ । ସେତେବେଳକୁ ତାଙ୍କର ମୃତ୍ୟୁ ଘଟି ସାରିଥିଲା।
