ସ୍ୱାସ୍ଥ୍ୟ କାର୍ଡ ବାଣ୍ଟିବାକୁ ଆସି ହଟହଟା ହେଲେ କ୍ରୀଡା ମନ୍ତ୍ରୀ

କାକଟପୁର(ବଡ଼ ଖବର ବ୍ୟୁରୋ): ରଖିଲେନି ପ୍ରତିଶ୍ରୁତି, ମନ୍ତ୍ରୀ ହଟହଟା । ସ୍ୱାସ୍ଥ୍ୟ କାର୍ଡ ବାଣ୍ଟିବାକୁ ଆସି ହୀନସ୍ଥା ହେଲେ କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା । ମନ୍ତ୍ରୀଙ୍କୁ ଘେରିଲେ ଗ୍ରାମବାସୀ । ଖାଲି ମନ୍ତ୍ରୀ ନୁହନ୍ତି ବାଦପଡିଲେନି ବ୍ଲକ ଚେୟାରମ୍ୟାନ, ଜିଲ୍ଲାପରିଷଦ ଅଧ୍ୟକ୍ଷ, ଅସ୍ତରଙ୍ଗ ବିଡିଓ, ପ୍ରଶାସନିକ ଅଧିକାରୀ । ସମସ୍ତଙ୍କୁ କରାଗଲା ଘେରାବନ୍ଦୀ । ପୁରୀ ଅସ୍ତରଙ୍ଗ ବ୍ଲକ ଶିଶୁଅ ପଞ୍ଚାୟତ ତଣ୍ଡାହାର ଗ୍ରାମବାସୀଙ୍କ କ୍ଷୋଭ ସାମ୍ନାକୁ ଆସିଛି ।

ରାସ୍ତା ସମସ୍ୟା ନେଇ ଦୀର୍ଘ ବର୍ଷ ହେଲା ଜଣାଇ ଆସୁଥିଲେ ଗ୍ରମାବାସୀ । ହେଲେ ଶୁଣୁନଥିଲା ପ୍ରଶାସନ । ମନ୍ତ୍ରୀ ଆସିବେ ବୋଲି ମାଟି ରାସ୍ତାରେ ପକାଇଥିଲେ ବାଲିବସ୍ତା । ଗାଁ ଭିତରକୁ ମନ୍ତ୍ରୀ ପଶିଲେ, ବାଲିବସ୍ତା କାଢିଲେ ଲୋକେ । ଯାହା ଫଳରେ ଗାଁରୁ ଫେରିପାରି ନଥିଲେ ମନ୍ତ୍ରୀ ତୁଷାରକାନ୍ତି ବେହେରା । ପ୍ରତି ଜିଲ୍ଲାକୁ ଯାଇ ନୂଆ ସ୍ମାର୍ଟ ହେଲଥ୍ କାର୍ଡ ବାଣ୍ଟୁଛନ୍ତି ମୁଖ୍ୟମନ୍ତ୍ରୀ । ସେଇଭଳି ମନ୍ତ୍ରୀ ତୁଷାରକାନ୍ତି ବେହେରା ଅସ୍ତରଙ୍ଗ ବ୍ଲକ ତଣ୍ଡାହାର ଗାଁକୁ ଯାଇଥିଲେ ସ୍ୱାସ୍ଥ୍ୟ କାର୍ଡ ବାଣ୍ଟିବା ପାଇଁ । ଦୀର୍ଘ ଦିନ ଧରି ଲୋକଙ୍କ ସମସ୍ୟା କାକଟପୁର ବିଧାୟକ ଶୁଣୁନଥିବାରୁ ଲୋକେ ତାତିଥିଲେ । ସ୍ୱାସ୍ଥ୍ୟକାର୍ଡ ବାଣ୍ଟିବାକୁ ସମୟ ମିଳଛି ହେଲେ ରାସ୍ତା ତିଆରିକୁ କାହିଁକି ସମୟ ନାହିଁ ବୋଲି କହିଛନ୍ତି ଗ୍ରାମବାସୀ ।

ଯୁବକଙ୍କୁ ଗିରଫ କରିବାର ଧମକ ମଧ୍ୟ ଦେଇଛନ୍ତି । ସେପଟେ ପୁଣି ପ୍ରତିଶ୍ରୁତି ଦେଇଛନ୍ତି ମନ୍ତ୍ରୀ ତୁଷାରକାନ୍ତି ବେହେରା । ବିକାଶ ନାହିଁ କିନ୍ତୁ କାର୍ଡ ବାଣ୍ଟି ଭୋଟ ହାତେଇବାକୁ ଆସିଥିଲେ ମନ୍ତ୍ରୀ ତୁଷାରକାନ୍ତି ବେହେରା । ହେଲେ ଜବାବ ଦେଲେ ଗ୍ରାମବାସୀ । ଲୋକ ପ୍ରତିନିଧିଙ୍କୁ ଲୋକେ ବିକାଶ ଓ ସତ ଦେଖାଇଦେଲେ ।