ପାକିସ୍ତାନ ବିରୋଧୀ ରାଲିରେ ଆଖିବୁଜା ଗୁଳିଚଳାଇଲା ତାଲିବାନ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦିନକୁ ଦିନ ବଢିବାରେ ଲାଗିଛି ତାଲିବାନର କ୍ରୁରତା । କାବୁଲରେ ପାକିସ୍ତାନ ବିରୋଧରେ ହେଉଥିବା ରାଲିରେ ଆଖିବୁଜା ଗୁଳିଚଳାଇଛି ତାଲିବାନ । ତେବେ ଆଫଗାନିସ୍ତାନ କାର୍ଯ୍ୟରେ ପାକିସ୍ତାନ ବାରମ୍ବାର ହସ୍ତକ୍ଷେପ କରୁଛି ବୋଲି ସେମାନେ ଅଭିଯୋଗ କରିଛନ୍ତି । ରାଲିରେ ବହୁସଂଖ୍ୟକ ମହିଳା ସାମିଲ ହୋଇଥିଲେ । ଏହି ରାଲିଟିକୁ ସେମାନେ ରାଷ୍ଟ୍ରପତି ବାସଭବନ ପାଖରେ ଥିବା ସେରେନା ହୋଟେଲ ନିକଟରେ କରୁଥିଲେ ।
କାରଣ ଗତ ସପ୍ତାହେ ଧରି ଆଇଏସଆଇ ମୁଖ୍ୟ ଏହି ହୋଟେଲରେ ରହିଆସୁଛନ୍ତି । ତେବେ ଏହି ଗୁଳିମାଡ଼ରେ କେତେଜଣ ମୃତାହତ ହୋଇଛନ୍ତି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇ ନାହିଁ । ମିଳିଥିବା ସୂଚନା ଅନୁଯାୟୀ ଏହି ରାଲିରେ ପାଖାପାଖି ୭୦୦ରୁ ଅଧିକ ଲୋକ ସାମିଲ ଥିଲେ । ଅପରପକ୍ଷରେ ଆଫଗାନିସ୍ତାନର ଅନେକ ଅଞ୍ଚଳରେ ପୂର୍ବରୁ ପାକିସ୍ତାନ ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଛି ।
ହେଲେ ପ୍ରଥମଥର ପାଇଁ ଆଫଗାନିସ୍ତାନର ରାଜଧାନୀ କାବୁଲ ଠାରେ ପାକ ବିରୋଧୀ ନାରା ଶୁଣିବାକୁ ମିଳିଥିଲା । କେବଳ ଏତିକି ନୁହେଁ ବରଂ ଗତକାଲି ଇରାନ ମଧ୍ୟ ପଞ୍ଜଶିରରେ ପାକିସ୍ତାନୀ ବାୟୁସେନା ଆକ୍ରମଣକୁ ବିରୋଧ କରିଥିଲା ଏବଂ ଆଫଗାନିସ୍ତାନରେ ବାହ୍ୟ ଦେଶର ହସ୍ତକ୍ଷେପକୁ ନିନ୍ଦା କରିଥିଲା ।