ମହାରାଷ୍ଟ୍ରରେ ତୃତୀୟ ଲହର!
ମୁମ୍ବାଇ (ବଡ଼ ଖବର ବ୍ୟୁରୋ): ଦେଶରେ କରୋନା ଗ୍ରାଫ ଉପର ମୁହାଁ । ମହାରାଷ୍ଟ୍ରରେ ସ୍ଥିତି ଜଟିଳ । କରୋନାର ଭାରତୀୟ ପ୍ରଜାତି ନୂତନ ଭାଇରସର ୫୦% ନମୁନା କେବଳ ମହାରାଷ୍ଟ୍ରରେ ଦେଖିବାକୁ ମିଳିଛି । ଆଉ ଏପରି କ୍ଷେତ୍ରରେ ଅକ୍ସିଜେନର ଅଭାବ ମଧ୍ୟ ରାଜ୍ୟରେ ଦେଖିବାକୁ ମିଳିଛି । ବିଭିନ୍ନ ଅସୁବିଧା ଦେଇ ଏବେ ଗତି କରୁଛି ମହାରାଷ୍ଟ୍ର । ୨୪ଘଣ୍ଟା ମଧ୍ୟରେ ୬୬ହଜାର ୧୫୯ ନୂଆ ଆକ୍ରାନ୍ତ ଚିହ୍ନଟ ହୋଇଥିବାବେଳେ ୭୭୧ଙ୍କ ମୃତ୍ୟୁ ହୋଇଛି ।
ତେବେ ବର୍ତ୍ତମାନ କରୋନାର ଦ୍ୱିତୀୟ ଲହରୀ ଚାଲୁଥିବା ବେଳେ ଜୁଲାଇ, ଅଗଷ୍ଟ ମାସ ସୁଦ୍ଧା ମହାରାଷ୍ଟ୍ରରେ ସଂକ୍ରମଣର ତୃତୀୟ ଲହରୀ ସୃଷ୍ଟି ହେବାର ସମ୍ଭାବନା ରହିଛି । ଗୁରୁବାର ଏପରି ଏକ ବିବୃତି ରଖିଛନ୍ତି ମହାରାଷ୍ଟ୍ର ସ୍ୱାସ୍ଥ୍ୟମନ୍ତ୍ରୀ ରାଜେଶ ତୋପ । ଗୁରୁବାର କରୋନା ସ୍ଥିତିକୁ ନେଇ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏକ ସମୀକ୍ଷା ବୈଠକ କରିଥିଲେ । ଯେଉଁଥିରେ ସ୍ୱାସ୍ଥ୍ୟମନ୍ତ୍ରୀ ଏପରି କହିଥିବା ସୂଚନା ମିଳିଛି । ତେବେ ସେ ଆହୁରି ମଧ୍ୟ କହିଛନ୍ତି ଯେ, ଯଦି ରାଜ୍ୟରେ ଜୁଲାଇ ଅଗଷ୍ଟ ସୁଦ୍ଧା ତୃତୀୟ ଲହର ସୃଷ୍ଟି ହୁଏ ତେବେ ରାଜ୍ୟ ପାଇଁ ନୂଆ ନୂଆ ଚ୍ୟାଲେଞ୍ଜ ସୃଷ୍ଟି ହେବ । ଆଉ ସେଥିପାଇଁ ସବୁ ଜିଲ୍ଲା ପ୍ରଶାସନକୁ ମଧ୍ୟ ସଜାଗ ରହିବାକୁ କହିଛନ୍ତି ସ୍ୱାସ୍ଥ୍ୟମନ୍ତ୍ରୀ ରଜେଶ ତୋପ ।