ପୋଲିସ ବିରୋଧରେ ଲୋକଙ୍କ ମେଳି

ତିର୍ତ୍ତୋଲ (ବଡ ଖବର ବ୍ୟୁରୋ): ଗତ ନଭେମ୍ବର ୬ ରାତିରେ ତିର୍ତ୍ତୋଲ ଥାନା କନକପୁର ବଜାରରେ ମେଡ଼ିସିନ ଷ୍ଟୋର ଭଙ୍ଗାରୁଜା ଘଟଣାରେ ରାଜନୈତିକ ହିଂସାକାଣ୍ଡ ହୋଇଥିଲା ।ଏହାର ୧୦ ଦିନ ପରେ ପୋଲିସ ଅଭିଯୁକ୍ତମାନଙ୍କୁ ଗିରଫ ନକରିବା ପ୍ରତିବାଦରେ ଆଜି କନକପୁର ବଜାର କମିଟି ଓ ଆଞ୍ଚଳିକ ନାଗରିକ ସୁରକ୍ଷା ମଞ୍ଚ,କନକପୁର ପକ୍ଷରୁ ପ୍ରତିବାଦ ସଭା ଅନୁଷ୍ଠିତ ହୋଇଯାଇଛି ।ଏହି ପ୍ରତିବାଦ ସଭାରେ ତିର୍ତ୍ତୋଲ ବ୍ଲକ ବିଜେପି ସଭାପତି ଅଶୋକ ମହାନ୍ତି ଯୋଗଦେଇ ପୋଲିସ କାର୍ୟ୍ୟ ଦକ୍ଷତା ପ୍ରତି ଆଙ୍ଗୁଳି ନିର୍ଦ୍ଦେଶ କରିଥିଲେ । ଉଚ୍ଚ ପଦସ୍ଥ ପୋଲିସ ପ୍ରଶାସନିକ ଅଧିକାରୀମାନେ ଏହାର ତଦନ୍ତ କରିବା ସହିତ ତୁରନ୍ତ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ସେ ଦାବି କରିଥିଲେ । ଯଦି ଖୁବ ଶୀଘ୍ର ଏହାର ସମାଧାନ ନହୁଏ ତେବେ ଆଗାମୀ ଦିନରେ ଆନ୍ଦୋଳନକୁ ଜୋରଦାର କରାଯିବା ସହିତ ରାଜରାସ୍ତାକୁ ଓହ୍ଲାଇବେ ବୋଲି ସ୍ଥାନୀୟ ଅଞ୍ଚଳର ବହୁ ବରିଷ୍ଠ ବ୍ୟକ୍ତି ପ୍ରତିବାଦ ସଭାରେ ଚେତାବନୀ ଦେଇଥିଲେ ।