କେନ୍ଦୁଝର (ବଡ଼ ଖବର ବ୍ୟୁରୋ): କେନ୍ଦୁଝର ଜିଲ୍ଲା ଟ୍ରକ୍ ମାଲିକ ସଂଘ ନିର୍ବାଚନ, ହୁଲୁସ୍ତୁଲୁ ହେଲାଣି ପ୍ରଚାର ମଇଦାନ । ଆସନ୍ତା ମାସରେ ହେବାକୁ ଥିବା କେନ୍ଦୁଝର ଜିଲ୍ଲା ଟ୍ରକ୍ ମାଲିକ ସଂଘ ନିର୍ବାଚନ ପାଇଁ ମାହୋଲ ସରଗରମ ହେଲାଣି । ପାଖାପାଖି ୫୦୦୦ ସ୍ଥାନୀୟ ଟ୍ରକ ମାଲିକଙ୍କ ଦ୍ୱାରା ଗଠିତ ହୋଇଥିବା ଏହି ସଂଘର ନିର୍ବାଚନ ସବୁ ସମୟରେ ଜିଲ୍ଲାର ଏକ ପ୍ରମୁଖ ନିର୍ବାଚନ ଭାବେ ଗଣାଯାଇଥାଏ । ତେବେ ଏହି ସଂଘର କର୍ମକର୍ତା ଚୟନ ପାଇଁ ପ୍ରତି ସାଢେ ତିନି ବର୍ଷରେ ଥରେ ନିର୍ବାଚନ ହେଉଥିବା ବେଳେ ଏଥର ଆସନ୍ତା ସେପ୍ଟେମ୍ବର ୨୪ ତାରିଖରେ ଏହି ନିର୍ବାଚନ ହେବାକୁ ସ୍ଥିର ହୋଇଛି ଓ ଏଥି ପାଇଁ ପ୍ରାର୍ଥୀପତ୍ର ଦାଖଲ ଶେଷ ହୋଇଛି । ଅନ୍ୟପକ୍ଷରେ ସଂଘର ୨୧ଟି ପଦବୀ ପାଇଁ ନିର୍ବାଚନ ହେବାକୁ ଥିବା ବେଳେ ୧୨୦ଜଣ ପାର୍ଥୀପତ୍ର ଦାଖଲ କରି କ୍ୟାମ୍ପେନିଂ ଆରମ୍ଭ କରିବା ସହ ଛକ ବଜାରରେ ବଡ ବଡ ହୋଡିଂ ମାରିବା ଆରମ୍ଭ କରିଦେଲେଣି । କେନ୍ଦୁଝର ଗନ୍ଧମାର୍ଦନ ଓ.ଏମ୍.ସି ଖଣିରୁ ଲୁହାପଥର ପରିବହନ କରୁଥିବା ଜିଲ୍ଲାର ଟ୍ରକ୍ ମାଲିକ ମାନଙ୍କୁ ନେଇ ୧୯୮୫ ମସିହାରୁ ଗଠନ ହୋଇଛି କେନ୍ଦୁଝର ଜିଲ୍ଲା ଟ୍ରକ ମାଲିକ ସଙ୍ଘ ।
