ଧରାଦଉନି ଜିନ୍ନତ
ବାରିପଦା (ବଡ଼ ଖବର ବ୍ୟୁରୋ): ଶିମିଳିପାଳରୁ ଖସି ପଳାଇଥିବା ବାଘୁଣୀ ଜିନ୍ନତକୁ ଓଡ଼ିଶା ଫେରାଇ ଆଣିବାକୁ ଚାଲିଛି କସରତ। ହେଲେ ସଫଳ ହେଉନାହିଁ ବନ ବିଭାଗ। ଜିନ୍ନତକୁ ୩-୪ ଥର ଟ୍ରାଙ୍କୁଲାଇଜ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ବିଫଳ ହୋଇଛି ବନ ବିଭାଗ। ସୁନ୍ଦରବନରୁ ଅଭିଜ୍ଞ ବାଘ ଧରାଳି ଫେଲ ମାରିବା ପରେ ଟ୍ରଙ୍କୁଲାଇଜ କରିବାରେ ବି ବିଫଳ ବନ ବିଭାଗ । ଟ୍ରଙ୍କୁଲାଇଜକରିବା ପାଇଁ ବାଘୁଣୀକୁ ଛେଳି ,ମଇଁଷି ଥୋପ ଦେବା ପରେ ବି ବାହାରକୁ ଆସୁନି ବାଘୁଣୀ । କାଜିରଙ୍ଗାରୁ ସ୍ଵତନ୍ତ୍ର ଟ୍ରଙ୍କୁଲାଇଜ ଟିମ୍ ଏବେ ପୁରୁଲିଆର ବିଦ୍ୱାନ ଜଙ୍ଗଲରେ ପହଞ୍ଚିଛନ୍ତି।
ତେବେ ଟ୍ରଙ୍କୁଲାଇଜ ବିଫଳ ପରେ ବାଘୁଣୀ ଉତ୍ତେଜିତ ହେଇ ଜନ ବସତି ଆଡ଼କୁ ପଳେଇ ଆସିବାର ଭୟ ରହିଛି। ଫଳରେ ପୁରୁଲିଆ ଝାଡଗ୍ରାମ ଅଞ୍ଚଳରେ ହାଇ ଆଲର୍ଟ ଜାରି କରାଯାଇଛି। ବାଘୁଣୀ ଜିନ୍ନତକୁ ଟ୍ରାକ କରିବା ପାଇଁ ଲାଗିଛନ୍ତି ଦୁଇ ରାଜ୍ୟର ୩ଟି ଟିମ୍। ଓଡ଼ିଶାର ଗୋଟିଏ ଟିମ, ସୁନ୍ଦରବନ ଟିମ ସମେତ ପଶ୍ଚିମବଙ୍ଗର ଦୁଇଟି ଟିମ ଜିନ୍ନତ୍କୁ ଟ୍ରାକ୍ କରିବାରେ ଲାଗିଛନ୍ତି। ବାଘୁଣୀ ଜିନ୍ନତ ଏବେ ପଶ୍ଚିମବଙ୍ଗ ଜଙ୍ଗଲରେ ବୁଲୁଛି। ଯଦିଓ ଏବେ ଟ୍ରାଙ୍କୁଲାଇଜ ପାଇଁ ହାତୀର ସହାୟତା ନିଆଯାଇନି, ଆବଶ୍ୟକ ପଡ଼ିଲେ ସେ ବିକଳ୍ପ ବି ଆପଣାଯିବ। ଖୁବଶୀଘ୍ର ଶିମିଳିପାଳ ଅଭୟାରଣ୍ୟ ଫେରାଇ ଆଣିବାକୁ ସବୁ ପ୍ରକାର ଚେଷ୍ଟା କରାଯିବ ବୋଲି କହିଛନ୍ତି ବନ୍ୟପ୍ରାଣୀ ପିସିସିଏଫ୍।