ସିସିଟିଭିରେ ରଙ୍ଗ ମାରି ଏଟିଏମ ଲୁଟିନେଲେ

ଉଦଳା (ବଡ଼ ଖବର ବ୍ୟୁରୋ): ଦୁର୍ବୃତ୍ତ ଲୁଟିନେଲେ ଏଟିଏମ। ଏକ ନୂଆ ଫଣ୍ଡାରେ କରିଲେ ଲୁଟ। ନିଜ ଚେହେରାକୁ ସିସିଟିଭିରୁ ବଞ୍ଚାଇବା ପାଇଁ ସିସିଟିଭିରେ ଲାଲ ରଙ୍ଗ ସ୍ପ୍ରେ ମାରି ଲୁଟେରାମାନେ ଲୁଟ କରିଛନ୍ତି। ଏଭଳି ଘଟଣା ଘଟିଛି ଖୁଣ୍ଟା ଥାନା ଠାରୁ ମାତ୍ର ୩ଶହ ମିଟର ଦୂର ବଙ୍ଗଳା ଛକରେ। ବଙ୍ଗଳା ଛକରେ ଥିବା ଏକ ଏସଵିଆଇ ଏଟିଏମରେ ଗତକାଲି ବିଳମ୍ବିତ ରାତିରେ ହୋଇଛି ଲୁଟ। ଲୁଟେରାମାନେ ଏଟିଏମ ବାହାରେ ଥିବା ସିସିଟିଭିରେ ଲାଲ ରଙ୍ଗ ସ୍ପ୍ରେ ମାରିବା ପରେ ଏଟିଏମ ଭିତରେ ପଶି ଲୁଟିଛନ୍ତି।

ଲୁଟେରାମାନେ ଭିତରେ ପଶିବା ପରେ ସମସ୍ତ କ୍ୟାମେରାରେ ରଙ୍ଗ ସ୍ପ୍ରେ ମାରିବା ପରେ ଗ୍ୟାସ କଟରରେ ଏଟିଏମକୁ କାଟିଛନ୍ତି। ଯାହା ଫଳରେ କିଛି ଅଂଶ ଜଳି ମଧ୍ୟ ଯାଇଛି। ଏହା ପରେ ଲୁଟେରାମାନେ ସମସ୍ତ କ୍ୟାସ ଟ୍ରେରୁ ଲୁଟ କରି ଫେରାର ହୋଇଯାଇଛନ୍ତି। ଏପରିକି ଲୁଟ ପରେ ସାଇରନ ବାଜିବା ଡରରେ ସାଇରନକୁ ମଧ୍ୟ ପିଟି ଭାଙ୍ଗି ଦେଇଛନ୍ତି। ତେବେ କେତେ ଟଙ୍କା ଲୁଟ ହୋଇଛି ତାହା ଜଣାପଡ଼ିନଥିବା ବେଳେ ଗତକାଲି ଏହି ଏଟିଏମରେ ଟଙ୍କା ଲୋଡ଼ ହୋଇଥିବା କୁହାଯାଉଛି। ତାହାକୁ ନଜର କରିଲେ ବ୍ୟାପକ ଭାବେ ଲୁଟ ହୋଇଥିବା କୁହାଯାଉଛି। ଖୁଣ୍ଟା ପୋଲିସ ସାଇଣ୍ଟିଫିକ ଟିମ ସହାୟତାରେ ତଦନ୍ତ କୁ ତ୍ୱରାନ୍ୱିତ କରିଛି।