ଝାରସୁଗୁଡା (ବଡ଼ ଖବର ବ୍ୟୁରୋ): ଜାନୁଆରୀ ୨୯ରେ ହୋଇଥିଲା ନବ ଦାସଙ୍କ ହତ୍ୟା । ମାର୍ଚ୍ଚ ୨୯ରେ ହେଲା ଖାଲିଥିବା ଝାରସୁଗୁଡ଼ା ଆସନ ପାଇଁ ତାରିଖ ଘୋଷଣା । ଆଉ ସମସ୍ତଙ୍କ ନଜର ନବ ଦାସଙ୍କ ପରିବାର ଉପରେ । କାରଣ ଏକଥା ସମସ୍ତେ ଜାଣନ୍ତି ଶାସକ ବିଜୁ ଜନତା ଦଳର ଟିକଟ ନବ ଦାସଙ୍କ ପରିବାରରୁ ହିଁ ଜଣଙ୍କୁ ମିଳିବ । ତେବେ ପୂର୍ବରୁ ଟିକଟ ଦୌଡ଼ରେ କେବଳ ଜଣିଏ ଥିଲେ । ନବ ଦାସଙ୍କ ଝିଅ ଦୀପାଲି ଦାସ । ନବ ବଞ୍ଚିଥିବା ବେଳେ ଦୀପାଲିଙ୍କୁ ରାଜନୀତିରେ ପ୍ରମୋଟ ବି କରୁଥିଲେ । ତେଣୁ ସମସ୍ତେ ଧରିନେଇଥିଲେ ଦୀପାଲି ଟିକଟ ପାଉଛନ୍ତି ।
https://youtu.be/Yg-INx1Fm34
କିନ୍ତୁ ଏବେ ଯାହା ଜଣାପଡ଼ୁଛି ନବଙ୍କ ଉତ୍ତରାଧିକାରୀ ଭାବେ ତାଙ୍କୁ ପୁଅ ବିଶାଲ ଦାସ ବି ଟିକଟ ଆଶାୟୀ ଅଛନ୍ତି । ବାପାଙ୍କ ଅଧୁରା ସ୍ୱପ୍ନ ପୂରଣ ପାଇଁ ସେ ବିଧାୟକ ହେବାକୁ ଚାହୁଁଛନ୍ତି । ପରିବାରରେ କାହାରି ଜଣଙ୍କ ନାଁକୁ ନେଇ ସମ୍ମତି ହୋଇପାରିନାହିଁ । ତେଣୁ ଶେଷ ନିଷ୍ପତ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଉପରେ ଛାଡିଦେଇଛନ୍ତି ଉଭୟ । ସେ ଯାହାକୁ ଚାହିଁବେ ସେ ଲଢିବେ ବୋଲି କହିଛନ୍ତି । ଦୀପାଲି ଇମୋସନାଲ ହୋଇଯାଇଛନ୍ତି । ଯାହା ସ୍ୱାଭାବିକ ମଧ୍ୟ । ଟିକଟ ନିଷ୍ପତ୍ତି ସିଏମଙ୍କ ବୋଲି କହିଛନ୍ତି । ଠିକ୍ ସମାନ କଥା କହିଛନ୍ତି ବିଶାଲ ।
ଦୀପାଳି କହିନାହାନ୍ତି ବିଶାଲ ଟିକଟ ପାଆନ୍ତୁ କିମ୍ବା ବିଶାଲ କହିନାହାନ୍ତି ଦୀପାଲି ଟିକଟ ପାଆନ୍ତୁ । ଅର୍ଥାତ୍ ଉଭୟ ଟିକଟ ପାଇଁ ଆଶାୟୀ ଅଛନ୍ତି । କିଏ ହେବ ନବଙ୍କ ରାଜନୈତିକ ଉତ୍ତରାଧିକାରୀ? କାହାକୁ ବାଛିବ ବିଜେଡି? ଝିଅ ନା ପୁଅ? ଦୀପାଲି ନା ବିଶାଲ? ଏହାର ଉତ୍ତର ଖୁବ୍ କମ୍ ଦିନରେ ସ୍ପଷ୍ଟ ହୋଇଯିବ ।
