ଶୁଳିଆପଦା (ବଡ଼ ଖବର ବ୍ୟୁରୋ): ପୁଳାପୁଳା ଦୁର୍ନୀତି ଓ ବେଆଇନ କାର୍ଯ୍ୟପାଇଁ ବର୍ଷ ତମାମ ଚର୍ଚ୍ଚାରେ ରହିଥାଏ ମୟୂରଭଞ୍ଜ ଶୁଳିଆପଦା ବିଇଓଙ୍କ କର୍ଯ୍ୟାଳୟ । ପୁଣି ଆଉ ଏକ ନୂଆ ବିବାଦକୁ ଖୋଳି ବାହାର କରିଛି ସୂଚନା ଅଧିକାର ତଥ୍ୟ । ବହୁ ଚର୍ଚ୍ଚିତ ବାଘଡା ନୋଡାଲ ଉଚ୍ଚ ବିଦ୍ୟାଳୟର ଶିକ୍ଷାସହାୟିକା ତନୁଶ୍ରୀ ପାଲ ଗତ ତା. ୭.୧.୨୦୧୯ରେ ଶେଷଥର ପାଇଁ ବିଦ୍ୟାଳୟ ଆସିଥିଲେ । ଏହାପରଠାରୁ ସେ ଆଉ ବିଦ୍ୟାଳୟ ଆସିନାହାଁନ୍ତି କି ସୂଚନା ଅଧିକାର ତଥ୍ୟ ମୁତାବକ ତାଙ୍କର ଛୁଟି ମଧ୍ୟ ମଞ୍ଜୁର ହୋଇନାହିଁ ।
ବଡ଼ ଖବରରେ ଏନେଇ ବହୁଥର ତଥ୍ୟଭିତ୍ତିକ ଖବର ପ୍ରକାଶିତ ହୋଇଛି । ବିଦ୍ୟାଳୟର ସଭାପତି ଗୁଣାନିଧି ରଣା ଓ ତତ୍କାଳୀନ ପ୍ରଧାନଶିକ୍ଷୟିତ୍ରୀ ସୂର୍ଯ୍ୟମଣୀ ଧଳ ବିଭିନ୍ନ ସମୟରେ ବିଇଓ ମାଳତୀ ଟୁଡୁଙ୍କୁ ଲିଖିତ ଭାବେ ଅବଗତ କରିଥିଲେ ମଧ୍ୟ କୌଣସି କର୍ଯ୍ୟାନୁଷ୍ଠାନ ଗ୍ରହଣ କରାନଯାଇ ଓଲଟି ଦରମା ପ୍ରଦାନ କରାଯାଇଥିବା ଜଣାଯାଇଛି । ଏଥିସହିତ ଭୂଲରେ ଦରମା ହୋଇଯାଇଥିବା ଦର୍ଶାଇ ଦରମା ଫେରସ୍ତ ପାଇଁ ଦିଆଯାଇଥିବା ଏକ ଚିଠି ଆମର ହସ୍ତଗତ ହୋଇଛି । ତେବେ ପ୍ରଶ୍ନ ଉଠୁଛି ଦରମା ଫେରସ୍ତ ଚିଠିଟି ପୂର୍ବରୁ ହୋଇଥିଲା ନା ଏବେ କରାଯାଇଛି ?
ଶିକ୍ଷା ସହାୟିକା ଚାକିରି ଚୁକ୍ତିଭିତ୍ତିକ ହୋଇଥିବାବେଳେ ବିନା ଛୁଟିରେ ୩୩ମାସ ଅନୁପସ୍ଥିତ ଥାଇ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଉନାହିଁ କାହିଁକି? ଉପଯୁକ୍ତ ତଦନ୍ତ କରାଗଲେ ଉକ୍ତ ରହସ୍ୟ ଉନ୍ମୋଚନ ହେବା ସହିତ ବେଆଇନ ଭାବେ ଦରମା ପ୍ରଦାନରେ ଜଡିତ ଅସାଧୁ କର୍ମଚାରୀ ଓ ଅଧିକାରୀମାନଙ୍କୁ ଚିହ୍ନଟ କରାଯାଇ ଦଣ୍ଡିତ କରାଯାଇପାରନ୍ତା ।
