ଭୁବନେଶ୍ୱର, (ବଡ଼ ଖବର ବ୍ୟୁରୋ): ଯୁବ ସାମ୍ବାଦିକ ପ୍ରବୀର ପ୍ରଧାନଙ୍କ ବିୟୋଗରେ ସମସ୍ତେ ଯେମିତି ଭାଙ୍ଗି ପଡ଼ିଛନ୍ତି । ତାଙ୍କ ଅମର ଆତ୍ମାର ସଦଗତି କାମନା କରି ବିଭିନ୍ନ ମହଲରୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି । ପୋଲିସ ସେବା ଭବନରେ ଏକ ଶ୍ରଦ୍ଧାଞ୍ଜଳି ସଭା ଆୟୋଜିତ ହୋଇଥିଲା । ପୋଲିସ କମିଶନର ସୁଧାଂଶୁ ଷଡ଼ଙ୍ଗୀଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିତ ରହି ଶ୍ରଦ୍ଧାଞ୍ଜଳି ଜଣାଇଥିଲା। ଏହା ସହ ପ୍ରବୀରଙ୍କ ବିୟୋଗରେ ପୋଲିସ ଡିଜି ମଧ୍ୟ ଶୋକବାର୍ତ୍ତା ଜାରି କରିଛନ୍ତି । ଅନ୍ୟପକ୍ଷରେ ଅନେକ ରାଜନେତା, ସାମ୍ବାଦିକ ମଧ୍ୟ ଶୋକ ପ୍ରକାଶ କରିଛନ୍ତି । କେନ୍ଦ୍ରମନ୍ତ୍ରୀ ଧମେନ୍ଦ୍ର ପ୍ରଧାନ, ବିଜେପି ଉପସଭାପତି ବୈଜୟନ୍ତ ପଣ୍ଡା, ସାଂସଦ ସସ୍ମିତ ପାତ୍ର ପ୍ରମୁଖ ଶୋକ ପ୍ରକାଶ କରିଛନ୍ତି ।
ରାଜ୍ୟର ପ୍ରାୟ ସମସ୍ତ ସାମ୍ବାଦିକ ପ୍ରବୀରଙ୍କ ବିୟୋଗରେ ମର୍ମାହତ ହେବା ସହ ସ୍ମୃତି ଚାରଣ କରିଛନ୍ତି । ଦକ୍ଷ କ୍ରାଇମ ରିପୋର୍ଟର ଭାବେ ସଫଳତାର ସହ କାର୍ଯ୍ୟ କରୁଥିଲା ପ୍ରବୀର । ତାଙ୍କ ରିପୋର୍ଟିଂ କରିବାର ଶୈଳୀ ସମସ୍ତଙ୍କ ମନ ମୋହିଥିଲା । ତେବେ କିଛିଦିନ ହେବ କରୋନାରେ ଆକ୍ରାନ୍ତ ଥିଲେ । ଗୁରୁବାର ସକାଳେ ତାଙ୍କର ଦେହାନ୍ତ ହୋଇଛି । କୋଭିଡରେ ତାଙ୍କ ପିତାଙ୍କ ମଧ୍ୟ ଦେହାନ୍ତ ହୋଇଛି ।
