ଟ୍ରମ୍ପଙ୍କ ଭିଡିଓ ଅପଲୋଡ୍ ନିଷେଧ କଲା ୟୁଟ୍ୟୁବ୍
ଆମେରିକା (ବଡ଼ ଖବର): ଫେସବୁକ, ଟ୍ୱିଟର ପରେ ଏବେ ୟୁଟ୍ୟୁବ୍ ଟ୍ରମ୍ପଙ୍କ ଭିଡିଓ ଅପଲୋଡକୁ ନିଷେଧ କରିଛି । ୧ ସପ୍ତାହ ପର୍ଯ୍ୟନ୍ତ ୟୁଟ୍ୟୁବ୍ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ‘ଅଫିସିଆଲ୍ ଚାନେଲ୍’କୁ ବ୍ଲକ୍ କରିଦେଇଛି । ୟୁଟ୍ୟୁବ ପକ୍ଷରୁ ଏକ ବିବୃତି ଜାରି କରାଯାଇଛି ଯେ, ଟ୍ରମ୍ପ ଏକ ଭିଡିଓ ଅପଲୋଡ୍ କରିଥିଲେ, ଯାହା ଆମ ନୀତିର ଉଲ୍ଲଂଘନ କରୁଥିଲା । ତେଣୁ ତାଙ୍କ ଚ୍ୟାନେଲ ଉପରେ ଆପେ ଆପେ ପ୍ରତିବନ୍ଧକ ଲାଗିଛି । ଆଗାମୀ ୭ ଦିନ ଯାଏ ଟ୍ରମ୍ପ ନିଜ ଚ୍ୟାନେଲରେ କୌଣସି ଭିଡିଓ ଅପଲୋଡ୍ କରିପାରିବେ ନାହିଁ । ଏହା ସହ ଟ୍ରମ୍ପଙ୍କ ଚ୍ୟାନେଲର କମେଣ୍ଟ ସେକ୍ସନକୁ ବି ବନ୍ଦ କରିଦିଆଯାଇଛି । ୨.୭୬ ନିୟୁତ ସବ୍ସ୍କ୍ରାଇବର୍ ଥିବା ଏହି ଚାନେଲ୍କୁ ଯଦି ହଟାଇ ଦିଆ ନ ଯାଏ ତେବେ ଦେଶବ୍ୟାପୀ ‘ୟୁଟ୍ୟୁବ୍’କୁ ବର୍ଜନ କରାଯିବ ବୋଲି ‘ସିଭିଲ୍ ରାଇଟସ୍ ଗ୍ରୁପ୍’ ଧମକ ଦେବା ପରେ କମ୍ପାନୀ ଏହି ପଦକ୍ଷେପ ଗ୍ରହଣ କରିଛି ।