ବିଧାନ ସଭାରେ ବିଦ୍ୟୁତ ତାତି

ଭୁବନେଶ୍ୱର: କେନ୍ଦ୍ରୀୟ ବିଦ୍ୟୁତ ଉତ୍ପାଦନ ସଂସ୍ଥା ଯଥା ଏନଟିପିସି ଓ ଏନଏଚପିସି ବିଗତ ୪ବର୍ଷରେ ହାରାହାରି ୟୁନିଟ୍ ପିଛା ଦର ଯଥାକ୍ରମେ ୬୮ ପଇସା ଓ ୬୦ପଇସା ବୃଦ୍ଧି କରିଛନ୍ତି । ଚଳିତ ଆର୍ଥିକ ବର୍ଷରେ ଆୟୋଗଙ୍କ ଦ୍ବାରା ନିର୍ଧାରିତ ବିଭିନ୍ନ ଶ୍ରେଣୀର ଉପଭୋକ୍ତାଙ୍କ ନିମନ୍ତେ ବର୍ଧିତ ବିଦ୍ୟୁତ ଦର ପଡୋଶୀ ରାଜ୍ୟ ଯଥା ପଶ୍ଚିମବଙ୍ଗ, ଝାଡଖଣ୍ଡ ଓ ଆନ୍ଧ୍ରପ୍ରଦେଶ ରାଜ୍ୟଠାରୁ କମ୍ ରହିଛି କିନ୍ତୁ ରାଜ୍ୟରେ ଗତ ୭ବର୍ଷ ମଧ୍ୟରେ ବିଦ୍ୟୁତ ଦରରେ କୌଣସି ବୃଦ୍ଧି କରାଯାଇ ନଥିବା ବେଳେ ଚଳିତବର୍ଷ ହାରାହାରି ୟୁନିଟ୍ ପିଛା ମାତ୍ର ୪ ପ୍ରତିଶତ ବଢିଛି। ଏହି ବିଦ୍ୟୁତ ଶୁକ୍ଳ ବୃଦ୍ଧି ପ୍ରକ୍ରିୟାରୁ ବିପିଏଲ୍ ବର୍ଗ ଓ କୃଷି କ୍ଷେତ୍ରକୁ ବାଦ୍ ଦିଆଯାଇଛି। ବିଜୁଳି ଦର ବୃଦ୍ଧି ସପକ୍ଷରେ ଆଜି ଏମିତି ଯୁକ୍ତି ରଖିଛନ୍ତି ଶକ୍ତି ମନ୍ତ୍ରୀ ଦିବ୍ୟଶଙ୍କର ମିଶ୍ର। ମନ୍ତ୍ରୀଙ୍କର ଉତ୍ତର ବିରୋଧୀଙ୍କୁ ସନ୍ତୁଷ୍ଟ କରିପାରି ନଥିବା ବେଳେ ବିଜେପି ବିଧାୟକମାନେ ତୀବ୍ର ପ୍ରତିକ୍ରିୟା ପ୍ରକାଶ କରିବା ସହିତ କକ୍ଷତ୍ୟାଗ କରିଥିଲେ।