ପୋଡି ପାଉଁଶ ହୋଇଗଲା ୪୦୦ କ୍ୱିଣ୍ଟାଲ ଧାନ

ରାଇଘର (ବଡ଼ ଖବର ବ୍ୟୁରୋ): ନିଆଁଲାଗି ଜଳିଗଲା ୪୦୦ କ୍ୱିଣ୍ଟାଲ ଧାନ । ଏଭଳି ଦୃଶ୍ୟ ଦେଖିବାକୁ ମିଳିଛି ଝରୀଗାଁ ବ୍ଲକ ଧମନାଗୁଡ଼ା ପଞ୍ଚାୟତ ଟିପାଗୁଡା ଠାରେ । ଆନୁମାନିକ ୪୦୦ କ୍ୱିଣ୍ଟାଲରୁ ଅଧିକ ଧାନ ପୋଡି ପାଉଁଶ ହୋଇଯାଇଥିବା ଅନୁମାନ କରାଯାଉଛି । ବିଳମ୍ବିତ ରାତିରେ ଧାନ ଖଳାରେ ନିଆଁ ଲାଗିଯାଇଥିଲା । ଧାନ ଜଗୁଥିବା ଦୁଇ ବ୍ୟକ୍ତି ଏହା ଦେଖି ଧାନ ମାଲିକ ଓ ଗ୍ରାମବାସୀଙ୍କୁ ଜଣାଇଥିଲେ । ଗ୍ରାମବାସୀ ନିଆଁ ଳିଭାଇବାକୁ ଚେଷ୍ଟା କରିବା ସହିତ ଦମକଳ ବିଭାଗକୁ ଫୋନ କରିଥିଲେ । ଘଟଣା ସ୍ଥଳରେ ଡାବୁଗାଁ ଦମକଳ ବାହାନୀ ପହଂଚି ନିଆଁକୁ ଆୟତ୍ତ କରିଥିଲେ । ବର୍ଷକର ପରିଶ୍ରମର ଫଳ ନିଆଁରେ ପୋଡି ନଷ୍ଟ ହୋଇଯାଇଥିବାରୁ, କ୍ଷତିଗ୍ରସ୍ତ ଚାଷୀ ଏବେ କିଭଳି ଋଣ ପରିଶୋଧ କରିବେ ତାକୁ ନେଇ ଚିନ୍ତାବ୍ୟକ୍ତ କରିଛନ୍ତି । ତେଣୁ କ୍ଷତିଗ୍ରସ୍ତ ପରିବାରଙ୍କୁ ସରକାରୀ ସହାୟତା ପାଇଁ ଅନୁରୋଧ କରିଛନ୍ତି ଗ୍ରାମବାସୀ ।