ଦିଲ୍ଲୀ ବିସ୍ଫୋରଣ ଘଟଣା : ଏହା ଏକ ଟ୍ରେଲର, ଆଗକୁ ଆହୁରି ଆକ୍ରମଣ ହୋଇପାରେ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଶୁକ୍ରବାର ଇସ୍ରାଏଲ ଦୂତାବାସ ସାମ୍ନାରେ ବିସ୍ଫୋରଣ ହୋଇଥିଲା । ଘଟଣା ସ୍ଥଳରୁ ଏକ ଲଫାପା ମିଳିଛି । ଏହି ଲଫାପାଟି ଇସ୍ରାଏଲ ଦୂତାବାସ ନାଁରେ ଆସିଥିଲା । ଏହା ଏକ ଟ୍ରେଲର, ଆଗକୁ ଆହୁରି ଆକ୍ରମଣ ହୋଇପାର, ଏଥିରେ ଉଲ୍ଲେଖ କରାଯାଇଛି । ଏହି ଲଫାପାଟି କେଉଁଟାରୁ ଆସିଥିଲା ଏହାକୁ କିଏ ପଠାଇଥିଲା ତାର ତଦନ୍ତ କରୁଛି ଦିଲ୍ଲୀ ପୋଲିସ । ଏହି ଧମକପୂର୍ଣ୍ଣ ଚିଠିରେ ପ୍ରାଣ ହରାଇଥିବା ଇରାନ ସୈନ୍ୟମୁଖ୍ୟ ମେଜର ଜେନେରାଲ କାସିମ୍ ସୁଲେମାନୀର ନାଁ ଲେଖାଯାଇଛି ।

ସୁଲେମାନୀ ଇରାନର ସବୁଠାରୁ ଶକ୍ତିଶାଳୀ କମାଣ୍ଡର ଥିଲେ । ଆମେରିକା ଏକ ଡ୍ରୋନ ଆକ୍ରମଣରେ ତାକୁ ନିପାତ କରିଥିଲା । ଚିଠିରେ ସୁଲେମାନୀ ବ୍ୟତୀତ ଆଉଜଣଙ୍କ ନାଁ ଲେଖାଯାଇଛି । ଏହା ଏକ ବୈଜ୍ଞାନିକଙ୍କର ନାମ ବୋଲି ଜଣାପଡିଛି । ଏଥିରେ ଇସ୍ରାଏଲ ରାଜଦୂତଙ୍କୁ ସମ୍ବୋଧିତ କରାଯାଇଛି । ପ୍ରତିଶୋଧପରାୟଣ ହୋଇ ଏପରି ବିସ୍ଫୋରଣ କରାଯାଇଥିବା ସନ୍ଦେହ କରାଯାଉଛି ।

ତେବେ ସ୍ଥାନୀୟ ଅଂଚଳର ସିସିଟିଭି ଫୁଟେଜ ଯାଂଚ କରୁଛି ପୋଲିସ । ଦିଲ୍ଲୀ ସମେତ ଉତ୍ତରପ୍ରଦେଶର ସମସ୍ତ ଗୁରୁତ୍ୱପୂର୍ଣ୍ଣ ସ୍ଥାନ ଗୁଡିକରେ ସୁରକ୍ଷା ବ୍ୟବସ୍ଥା କଡା କଡି କରାଯାଇଛି । କେନ୍ଦ୍ର ଗୃହମନ୍ତ୍ରୀ ଅମିତ ଶାହା ସୁରକ୍ଷା ଅଧିକାରୀଙ୍କ ସହ ବୈଠକ କରି ସ୍ଥିତିର ସମୀକ୍ଷା କରିଛନ୍ତି ।