ଭୋଗରାଇ(ବଡ଼ ଖବର ବ୍ୟୁରୋ): ଦ୍ରୁତଗତିରେ ବ୍ୟାପିବାରେ ଲାଗିଛି କରୋନାର ଦ୍ୱିତୀୟ ଲହର । ଯାହାକୁ ମାତ୍ଦେବା ପାଇଁ ଲକଡାଉନ ସଟଡାଉନକୁ ପୁଣି ଆପଣାଇଛନ୍ତି ସରକାର । ଜାରି ହୋଇଛି କଟକଣା । ଏପଟେ ପୁଣି ବୈଜ୍ଞାନିକଙ୍କ ଚିନ୍ତା ବଢାଇଛି ବେଙ୍ଗଲ ଭାଇରସ । ପଶ୍ଚିମବଙ୍ଗରେ ବ୍ୟାପୁଥିବା ଥାର୍ଡ ମ୍ୟୁଟାଣ୍ଟକୁ ନେଇ ଏବେ ସମସ୍ତଙ୍କ ଚିନ୍ତା ବଢିଯାଇଛି । ଯାହାକୁ ନେଇ ରାଜ୍ୟ ସରକାର ଜାରି କରିଛନ୍ତି କଟକଣା । ପଶ୍ଚିମବଙ୍ଗରୁ ଓଡ଼ିଶା ଫେରିଥିବା ଲୋକଙ୍କ ପାଇଁ କ୍ୱାରେନଣ୍ଟାଇନକୁ ବାଧ୍ୟତାମୂଳକ କରାଯାଇଛି । ଏଥିପାଇଁ ଓଡ଼ିଶା-ପଶ୍ଚିମବଙ୍ଗ ସୀମାରେ କରାଯାଇଛି ସ୍ୱତନ୍ତ୍ର ବ୍ୟବସ୍ଥା ।
ବାଲେଶ୍ୱରକୁ ଲାଗିଥିବା ପଶ୍ଚିମବଙ୍ଗ ସୀମାରେ ଡେରା ପକାଇଛି ପୋଲିସ । ବିଭିନ୍ନ ଜାଗାରେ ବ୍ଲକିଂ କରି ଲୋକଙ୍କ ପରୀକ୍ଷା କରାଯିବା ସହ ସାମାନ୍ୟ ଲକ୍ଷଣ ଥିଲେ ସେମାନଙ୍କୁ କ୍ୱାରେନଣ୍ଟାଇନର ବ୍ୟବସ୍ଥା କରାଯାଉଛି । କିନ୍ତୁ ଭୋଗରାଇରେ ସ୍ଥିତି କିଛି ଅଲଗା ଅଛି । ଏଠାରେ ମୁକୁଳା ପଡିଛି ସୀମା । ଯିଏ ଯେମିତି ପାରୁଛି ଯୋଉ ବାଟେ ପାରୁଛି ଯାଆ ଆସ କରିପାରୁଛି । ଭୋଗରାଇ ବ୍ଲକର ୩୨ ଗାଁ ପଶ୍ଚିମବଙ୍ଗ ସହ ଲାଗି ରହିଛି । ଏହି ରାସ୍ତା ଦେଇ ପ୍ରତିଦିନ ଲୋକେ ପଶ୍ଚିମବଙ୍ଗକୁ ଅବାଧରେ ଯିବା ଆସିବା କରୁଛନ୍ତି । ପ୍ରଶାସନ ପକ୍ଷରୁ ଏହି ସବୁ ସୀମାକୁ ତୁରନ୍ତ ସିଲ କରାଯିବାକୁ ସାଧାରଣରେ ଦାବି ହେଉଛି । ଏହା ବାଦ ଏହି ସବୁ ସ୍ଥାନରେ କ୍ୟାମ୍ପ ବସାଇ ଟେଷ୍ଟିଂ ଓ ସ୍କ୍ରିନିଂକୁ ଗୁରୁତ୍ୱଦେବା ଜରୁରୀ ହୋଇପଡିଛି ।
