ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦିଲ୍ଲୀରେ ଟିକା ସଙ୍କଟ । ଗଚ୍ଛିତ ଥିବା ଟିକା ଶେଷ ହୋଇ ସାରିଛି । ଫଳରେ ଶନିବାର ଠାରୁ ଦିଲ୍ଲୀରେ ୧୮ରୁ ୪୪ ବର୍ଷ ବୟସବର୍ଗଙ୍କ ଟିକାକରଣ ବନ୍ଦ କରାଯାଇଛି । ଏନେଇ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଶନିବାର ଅପରାହ୍ନରେ ଘୋଷଣା କରିଛନ୍ତି । ସହରରେ ମୋଟ ୩୬୮ ଟିକାଦାନ କେନ୍ଦ୍ର ଭିତରୁ ୨୩୫ଟି କେନ୍ଦ୍ରକୁ ଟିକା ଅଭାବରୁ ବନ୍ଦ କରି ଦିଆଯାଇଛି । ବାକି ଥିବା ୧୩୩ କେନ୍ଦ୍ରକୁ ଆଜି ବନ୍ଦ କରାଯିବ । ଦିଲ୍ଲୀରେ ସମସ୍ତ ନାଗରିକଙ୍କ ଟିକାକରଣ ପାଇଁ ଆହୁରି ୮୦ ଲକ୍ଷ ଟିକାର ଆବଶ୍ୟକତା ରହିଛି । କିନ୍ତୁ ରାଜ୍ୟରେ ଟିକା ନାହିଁ ।
ତେବେ ୨୪ଘଣ୍ଟା ମଧ୍ୟରେ ବିଦେଶୀ କମ୍ପାନୀଙ୍କଠାରୁ ଟିକା ଆଣି ସରକାର ରାଜ୍ୟମାନଙ୍କୁ ଯୋଗାନ୍ତୁ ବୋଲି ଦାବି କରିଛନ୍ତି କେଜ୍ରିୱାଲ । ସେହିପରି ଅନେକ ରାଷ୍ଟ୍ର ଆବଶ୍ୟକତା ଠାରୁ ଅଧିକ ଟିକାକୁ ଗଚ୍ଛିତ ରଖିଛନ୍ତି । ସରକାର ସେମାନଙ୍କୁ ଅନୁରୋଧ କଲେ ସେମାନେ ବଳକା ଟିକା ଗୁଡ଼ିକୁ ଭାରତକୁ ଦେବେ ବୋଲି ସେ ଆଶାବାଦୀ ଅଛନ୍ତି । ତେବେ ବାହାର କମ୍ପାନୀ ଗୁଡ଼ିକୁ ଭାରତରେ ଟିକା ଉତ୍ପାଦନ ପାଇଁ ସରକାର ଅନୁମତି ଦିଅନ୍ତୁ ବୋଲି ମଧ୍ୟ କେଜ୍ରିୱାଲ ସରକାରଙ୍କୁ ପରାମର୍ଶ ଦେଇଛନ୍ତି ।
