ଗାଁରେ ନାହିଁ ନେଟୱାର୍କ, ଗଛ ମୂଳେ ପାଠ ପଢୁଛନ୍ତି ପିଲା

ଭୁବନ (ବଡ଼ ଖବର ବ୍ୟୁରୋ): କରୋନା ମହାମାରୀ ଯୋଗୁଁ ବନ୍ଦ ରହିଛି ସମସ୍ତ ଶିକ୍ଷାନୁଷ୍ଠାନ । ଘରୋଇ ଶିକ୍ଷାନୁଷ୍ଠାନରେ ଅନଲାଇନ ପାଠପଢା ଚାଲିଥିବା ବେଳେ ସରକାରୀ ଶିକ୍ଷାନୁଷ୍ଠାନର ଛାତ୍ରଛାତ୍ରୀଙ୍କ ପାଇଁ ୟୁ ଟ୍ୟୁବରେ ପାଠପଢା ଆରମ୍ଭ ହୋଇଛି । ରାଜ୍ୟରେ ସରକାରୀ ଶିକ୍ଷାନୁଷ୍ଠାନରେ ପ୍ରଥମ ଶ୍ରେଣୀରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ଚଳିତ ମାସ ୨୧ ତାରିଖଠାରୁ ୟୁ ଟ୍ୟୁବ୍ ପାଠପଢା ଆରମ୍ଭ କରିଛନ୍ତି ରାଜ୍ୟ ସରକାର ।

କିଛି ଦିନ ହେବ ଗାଁରେ ମୋବାଇଲ ନେଟଓ୍ବାର୍କ ନଥିବାରୁ ପାଠପଢାରୁ ବଞ୍ଚିତ ହେଉଛନ୍ତି ବହୁ ଛାତ୍ରଛାତ୍ରୀ। ଗାଁ ଠାରୁ ଏକ କିମି ଦୂରରେ ଥିବା ବରଗଛ ମୂଳେ ପଢୁଛନ୍ତି ପାଠ । ଏପରି ଦୃଶ୍ୟ ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲା ଭୁବନ ବ୍ଲକ ଅନ୍ତର୍ଗତ ବାଉଁଶକଣ ଗ୍ରାମରେ। ତେବେ ଗ୍ରାମରେ ଏୟାରଟେଲ ଓ ଜିଓ ନେଟଓ୍ବାର୍କ କାମ କରୁଥିବା ବେଳେ ଗତ କିଛିଦିନ ହେବ ତାହା କାମ କରୁନଥିବାରୁ ସମସ୍ୟା ଉପୁଜୁଛି । ବାଧ୍ୟ ହୋଇ ପିଲାମାନେ ବରଗଛ ମୂଳେ ପାଠ ପଢୁଛନ୍ତି ।