ବଢିଲା ସୋନୁ ସୁଦଙ୍କ ଅଡୁଆ
ମୁମ୍ବାଇ (ବଡ଼ ଖବର ବ୍ୟୁରୋ): ବଢୁଛି ବଲିଉଡ ଅଭିନେତା ସୋନୁ ସୁଦଙ୍କ ଅଡୁଆ । ଆଜି ପୁଣି ସୋନୁଙ୍କ ଘରେ ପହଞ୍ଚିଛନ୍ତି ଆୟକର ବିଭାଗ । ଲଗାତାର ୩ ଦିନ ହେବ ସୋନୁଙ୍କୁ ଆଇଟି ଟିମ ଜେରା କରୁଛି । ଏ ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଥିଲା । ସୋନୁ ସୁଦଙ୍କ ଆୟ ଓ ଖର୍ଚ୍ଚ ସମ୍ବନ୍ଧରେ ପଚରାଉଚରା କରୁଛି ଆଇଟି ବିଭାଗ ।
ସୂଚନା ଅନୁସାରେ ଆଇଟି ସୋନୁ ସୁଦ ଚ୍ୟାରିଟି ଫାଉଣ୍ଡେସନର ଆକାଉଣ୍ଟ ମଧ୍ୟ ଯାଞ୍ଚ କରିପାରନ୍ତି । ଏହାପୂର୍ବରୁ ବୁଧବାର ଓ ଗୁରୁବାର ମଧ୍ୟ ସୋନୁଙ୍କ ଅଫିସ ଓ ଘରେ ସର୍ଭେ କରିଥିଲା ଆଇଟି ଟିମ । ଖାଲି ଏତିକି ନୁହେଁ ସୋନୁଙ୍କ ମୁମ୍ବାଇସ୍ଥିତ ଘର ସହ ଅନ୍ୟ ୫ଟି ଘର ଓ କାର୍ଯ୍ୟାଳୟରେ ପହଞ୍ଚି ତନାଘନା କରିଥିଲା ଆଇଟି ଟିମ ।
ତେବେ ସୋନୁଙ୍କ ଘରେ ଆୟକର ବିଭାଗ ସର୍ଭେ କରିଥିବା ବେଳେ ଏହାକୁ ନେଇ ନିଜ ପ୍ରତିକ୍ରିୟା ରଖିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । କେଜ୍ରିୱାଲ ସୋନୁଙ୍କୁ ସମର୍ଥନ କରି କହିଛନ୍ତି ଯେ, ସତ୍ୟପଥରେ ଚାଲିବାକୁ ହେଲେ ଅନେକ ବାଧା ଓ ଅସୁବିଧାର ସମ୍ମୁଖିନ କରିବାକୁ ପଡେ। ହେଲେ ଶେଷରେ ସର୍ବଦା ସତ୍ୟର ହିଁ ଜୟ ହୋଇଥାଏ । ସେ ଆହୁରି କହିଛନ୍ତି ଯେ, ସୋନୁଙ୍କ ସାଥିରେ ଭାରତର ଲକ୍ଷ ଲକ୍ଷ ଗରିବ ପରିବାରଲୋକଙ୍କ ଆଶୀର୍ବାଦ ରହିଛି । ଯେଉଁମାନଙ୍କ କଠିନ ସମୟରେ ସୋନୁ ତାଙ୍କ ସହିତ ରହିଥିଲେ ।