ଏନଏମଏ ବିନାନୁମତିରେ ଲାଗିଲା ରୂପା କବାଟ

ପୁରୀ(ବଡ଼ ଖବର ବ୍ୟୁରୋ): ଶ୍ରୀମନ୍ଦିର ପରିସରରେ ୮ଟି ପୁରୁଣା କବାଟ ସ୍ଥାନରେ ନୂଆ ରୂପା କବାଟ ଲଗାଯାଇଛି । ଯେଉଁଥିପାଇଁ ଏନଏମଏଙ୍କ ଅନୁମତି ନିଆଯାଇନଥିବା ଅଭିଯୋଗ ହୋଇଛି । ଆର୍କୋଲୋଜିକାଲ ସର୍ଭେ ଅଫ ଇଣ୍ଡିଆକୁ ରୂପା କବାଟ ଲଗାଇବା ପାଇଁ ଶ୍ରୀମନ୍ଦିର ପ୍ରଶାସନ ମାଗିଥିବା ଅନୁମତିପତ୍ର ସୂଚନା ଅଧିକାର ଆଇନ ବଳରେ ହସ୍ତଗତ ହେବା ପରେ ଏଭଳି ତଥ୍ୟ ସାମ୍ନାକୁ ଆସିଛି ।

ଶ୍ରୀମନ୍ଦିର ପ୍ରଶାସନ କଳାହାଟ ଦ୍ୱାର, ଜୟବିଜୟ ଦ୍ୱାର, ବେହରଣ ଦ୍ୱାର, ସାତପାହଚ ଦ୍ୱାର, ଭୋଗମଣ୍ଡପ ଦ୍ୱାର, ଆଦି ନୃସିଂହ ଦ୍ୱାର, ମା ବିମଳା ଏବଂ ମା ଲକ୍ଷ୍ମୀଙ୍କ ଦ୍ୱାର ବଦଳାଇ ରୁପା କବାଟ ଲଗାଇବା ପାଇଁ ଅନୁମତି ମାଗି ଜୁଲାଇ ୧୩ରେ ଚିଠି ଲେଖିଥିଲା ଶ୍ରୀମନ୍ଦିର ପ୍ରଶାସନ । ଯେଉଁଭଳି ଭାବରେ ପ୍ରତ୍ନତତ୍ତ୍ୱ ବିଭାଗର ଅନୁମତି ନିଆଯାଇଛି, ସେହିପରି ଏନଏମଏର ଅନୁମତି ନେବାକୁ ଆବଶ୍ୟକ ଥିବାବେଳେ ଶ୍ରୀମନ୍ଦିର ପ୍ରଶାସନର ଏଭଳି ତରବରିଆ ନିଷ୍ପତ୍ତିକୁ ନେଇ ଉଠଇଛି ପ୍ରଶ୍ନ ।