ଭୁବନେଶ୍ୱର(ବଡ଼ ଖବର ବ୍ୟୁରୋ): କଟକ ମହାନଦୀ ମୁଣ୍ଡଳିରେ ଫସିଥିବା ହାତୀକୁ ଉଦ୍ଧାର କରିବାକୁ ଯାଇ ଗତ ଶୁକ୍ରବାର ଘଟିଥିବା ବୋଟ ଟ୍ରାଜେଡିରେ ଓଟିଭିର ଚିଫ ରିପୋର୍ଟର ଅରିନ୍ଦମ ଦାସଙ୍କ ମୃତ୍ୟୁ ମାମଲା । ତେବେ ଏହି ଘଟଣାକୁ ଆଜିକି ୮ ଦିନ ବିତି ଗଲାଣି । ଅରିନ୍ଦମଙ୍କ ଅକାଳ ବିୟୋଗରେ ଚାରିଆଡୁ ଶୋକ ପ୍ରକାଶ ପାଇଥିବା ବେଳେ ସମ୍ପୂର୍ଣ୍ଣ ଭାଙ୍ଗିପଡିଛନ୍ତି ତାଙ୍କ ପରିବାର ଲୋକେ । ଅରିନ୍ଦମଙ୍କ ଏପରି ଚାଲିଯିବାର ଦୁଃଖରେ ପରିବାର ଲୋକ ଭାଙ୍ଗି ପଡିଥିବା ବେଳେ ଅଧିକ ଦୁଃଖ ଆଣିଛି ଅରିନ୍ଦମଙ୍କ ନାଁରେ ହେଉଥିବା ଅପପ୍ରଚାର । ତେବେ ଅରିନ୍ଦମଙ୍କ ପରିବାର ଆର୍ଥିକ ସହାୟତା ଚାହୁଁଥିବାର କିଛି ଲୋକେ ସୋସିଆଲ ମିଡିଆରେ ଅପପ୍ରଚାର କରୁଛନ୍ତି । ଯାହାକି ଆଦୌ ଗ୍ରହଣୀୟ ନୁହେଁ ।
ପରିବାର ଲୋକେ ଅଭିଯୋଗ କରିଛନ୍ତି ଯେ ଅରିନ୍ଦମଙ୍କ ନାଁରେ ମିଥ୍ୟା ଅପପ୍ରଚାର କରାଯାଉଛି । ଅସହ୍ୟ ଯନ୍ତ୍ରଣା ପରେ ଶେଷରେ ଏ ନେଇ ସୋସିଆଲ ମିଡିଆରେ ଜାବାବ୍ ରଖିଛନ୍ତି ଝରଣା । ତେବେ ଟ୍ୱିଟ କରିଛନ୍ତି ଯେ, ଆମେ ଏକ ଯୌଥ ପରିବାରରେ ଅଛୁ । ଆମେ ୩ ଭଉଣୀ ଓ ୨ ଭାଇ । ଆମ ସହ ମା,କକା,ଖୁଡୀ,ଭାଉଜ(ଅରିନ୍ଦମଙ୍କ ପତ୍ନୀ) ଓ ପୁଅ ଅଛନ୍ତି । ଆମେ ଭାଇଭଉଣୀ ଆର୍ଥିକ ଦୃଷ୍ଟି କୋଣରୁ ଖୁବ ସ୍ୱଚ୍ଛଳ । ଆମେ ଏକ ଯୌଥ ପରିବାରରୁ ହୋଇଥିବାରୁ ଭଇଙ୍କର ସମସ୍ତ ଦାୟିତ୍ୱ ତୁଲାଇପାରିବୁ । ଝରଣା ଆହୁରି ଲେଖିଛନ୍ତି ଆମ ଅରିନ୍ଦମ ଭାଇ ଜଣେ ସ୍ୱଚ୍ଛ ହୃଦୟର ପିଲା ଥିଲେ । ଭାଇ ସବୁବେଳେ ତା କାମକୁ ନେଇ ଉତ୍ସର୍ଗୀକୃତ ଥିଲା । ସେ କେବେ ହେଲେ ଟଙ୍କା ପଛରେ ଗୋଡାଉ ନ ଥିଲେ । ଆମେ ଏକ ପରିବାର ହିସାବରେ ଭାଇର ସ୍ତ୍ରୀ ଓ ପିଲାର ଦାୟିତ୍ୱ ନେଇ ପାରିବୁ ।
In this tough time, this is what I could think of doing to stop the rumors circulating about my brother Arindam Das. We are not in a condition to take these. Try to think what if it happens with your own family. Please stop making fun of anyone's tragedy 🙏 #ArindamDas pic.twitter.com/D7xBRpFH9S
— Jharana Das (@Jharna_2wt) October 1, 2021
ସେ କହିଛନ୍ତି ସୋସିଆଲ ମିଡିଆରେ ଆମର ଟଙ୍କା ଦରକାର ବୋଲି ହେଉଥିବା ଅପପ୍ରଚାରକୁ କଦାପି ବିଶ୍ୱାସ କରନ୍ତୁ ନାହିଁ । ଆମ ପରିବାର ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରୁଥିବା ସମସ୍ତଙ୍କୁ ମୋର ଆନ୍ତରିକତାରୁ ଧନ୍ୟବାଦ ଜଣାଉଛି । ମୋର ଭାଇର ବିୟୋଗରେ ଯେଉଁମାନେ ଏହାର ଫାଇଦା ନେବାକୁ ଚେଷ୍ଟା କରୁଛନ୍ତି, ସେମାନଙ୍କୁ ଅନୁରୋଧ କରୁଛି, ଦୟା କରି ଏପରି ଅପପ୍ରଚାର କରନ୍ତୁ ନାହଁ । ଏପରି ନ୍ୟୁଜ ସୋସିଆଲ ମିଡିଆରେ ଭାଇରାଲ କରନ୍ତୁ ନାହିଁ । ଆପଣଙ୍କ ପରିବାରରେ ଏପରି କିଛି ଅଘଟଣ ଘଟିଥିଲେ ଆପଣଙ୍କ ମାନସିକ ସ୍ଥିତି କିପରି ହୋଇଥିାନ୍ତା । ତେଣୁ ଅନ୍ୟର ଦୁଃଖର ଫାଇଦା ଉଠାନ୍ତୁ ନାହିଁ ବୋଲି ସେ ସମସ୍ତଙ୍କୁ ଅନୁରୋଧ କରୁଛନ୍ତି ।
