ଆମେ କାହିଁକି ଗୁଳି ମାରିବୁ, ତୁମେ ନିଜ ପାଇଁ ମରିବ: ଲାଲୁ ଯାଦବ

ପାଟନା(ବଡ଼ ଖବର ବ୍ୟୁରୋ): ଆରଜେଡି ମୁଖ୍ୟ ଲାଲୁ ଯାଦବ ବିହାର ପହଞ୍ଚିବା ପରେ ବିହାରରେ ରାଜନୀତି ସରଗରମ ହୋଇ ଉଠିଛି । କେତେବେଳେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଆରଜେଡିକୁ ଟାର୍ଗେଟ କରୁଥିବାବେଳେ ଆଉ କେତେବେଳେ ଲାଲୁ କରୁଥିବାର ଦେଖିବାକୁ ମିଳିଛି । ହଠାତ ଲାଲୁଙ୍କ ବିହାର ପହଞ୍ଚିବା ବୋଧେ ଏହାର କାରଣ ହୋଇପାରେ ବୋଲି ଅନୁମାନ କରାଯାଉଛି । ସେପଟେ ବିହାର ବିଧାନସଭାର ଦୁଇଟି ଆସନରେ ଉପ-ନିର୍ବାଚନ ହେବାକୁ ଯାଉଛି । ଏହା ମଧ୍ୟରେ ଲାଲୁ ଯାଦବ ନିର୍ବାଚନ ପ୍ରଚାର କରୁଥିବାର ଦେଖିବାକୁ ମିଳିଛି । ତେବେ ଆରଜେଡି କେବେ ବି ବିଜେପି ସହ ଆପୋଷ ବୁଝାମଣା କରିବ ନାହିଁ ବୋଲି ଲାଲୁ ଯାଦବ କହିଛନ୍ତି ।

ଏହା ସହ ପ୍ରଥମଥର ପାଇଁ ଲାଲୁ ଯାଦବ ତାଙ୍କ ମୁଣ୍ଡରେ ସବୁଜ ଟୋପି ଏବଂ ବେକରେ ସବୁଜ ରଙ୍ଗର ପୋଷାକ ପିନ୍ଧି କେବଳ ରାଜ୍ୟ ମୁଖ୍ୟମନ୍ତ୍ରୀ ନୀତିଶ କୁମାର ନୁହଁନ୍ତି ବରଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟ ଟାର୍ଗେଟ କରିଥିବାର ଦେଖିବାକୁ ମିଳିଛି । ଅନ୍ୟପଟେ ନୀତିଶ କୁମାରଙ୍କ ବୟାନକୁ ଟାର୍ଗେଟ କରି ଲାଲୁ ଯାଦବ ପାଲଟା ଆକ୍ରମଣ କରିଛନ୍ତି । ଆରଜେଡି ତୁମକୁ କାହିଁକି ଗୁଳି ମାରିବ, ତମେ ନିଜ ପାଇଁ ମରିବ ବୋଲି ଲାଲୁ କହିଛନ୍ତି । କେବଳ ଏତିକି ନୁହେଁ ବରଂ ଦେଶରେ ରେଳ, ଜାହାଜ ସବୁକିଛି ବିକ୍ରି ହେଇଗଲା । ଆଗାମୀ ଦିନରେ ଆଦାନୀ ପ୍ଲାଟଫର୍ମ ଉପରକୁ ଚଢିବା ପାଇଁ ପାଞ୍ଚ ହଜାର ଟଙ୍କା ମଧ୍ୟ ନେବେ କହି ମୋଦି ସରକାରଙ୍କୁ ସମାଲୋଚନା କରିଥିବାର ଦେଖିବାକୁ ମିଳିଛି ।