ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଶୀତ ଋତୁ ଆସିବା ସହ ଭାରତର ଧଡକନ ଦିଲ୍ଲୀରେ ପ୍ରବଳରୁ ଅତିପ୍ରବଳ ଥଣ୍ଡା ପଡ଼ିବା ଆରମ୍ଭ ହୋଇଥାଏ । ଏହାଛଡ଼ା ପ୍ରଦୂଷଣ ବି ଦିନକୁ ଦିନ ରେକର୍ଡ ଭାଙ୍ଗିଥାଏ । ଗତବର୍ଷ ଦିଲ୍ଲୀରେ ସବୁ ରେକର୍ଡ ଭାଙ୍ଗିଥିଲା ପ୍ରଦୂଷଣ । ଚଳିତ ବର୍ଷ ବି ସମାନ ଅବସ୍ଥା ଦେଖାଦେବ ବୋଲି ଶୁଣିବାକୁ ମିଳୁଛି । ତେବେ ଦିଲ୍ଲୀରେ ବାୟୁ ପ୍ରଦୂଷଣର ମୁଖ୍ୟ କାରଣ ହେଉଛି ଉତ୍ତର ଭାରତର ନଡ଼ାପୋଡ଼ି । ଯାହାକି ଭୟଙ୍କର ବାୟୁ ପ୍ରଦୂଷଣ ସୃଷ୍ଟି କରିଥାଏ । କିନ୍ତୁ ଏଥିପ୍ରତି କେହି ବି ସଚେତନ ହେଉନାହାନ୍ତି । ଗତବର୍ଷ ଏଥିରେ କଟକଣା ଲଗାଯାଇଥିବା ବେଳେ ଏହାକୁ ବିରୋଧ କରାଯାଉଥିବା ମଧ୍ୟ ଦେଖିବାକୁ ମିଳିଛି ।
ଅମଳ ଋତୁ ଆରମ୍ଭ ହେବା ସହ ନଡ଼ା ପୋଡ଼ିବା ବି ଆରମ୍ଭ କରିଥାନ୍ତି । ଯଦି ରିପୋର୍ଟ ଦେଖିବାକୁ ରବିବାର ଦିନ ପଞ୍ଜାବରେ ସର୍ବାଧିକ ୨ହଜାର ୮୯୫ଟି ସ୍ଥାନରେ ଚାଷୀମାନେ ଚାଷଜମିରେ ନଡ଼ା ପୋଡ଼ିଛନ୍ତି । ଗତବର୍ଷ ଅକ୍ଟୋବର ୩୧ ସୁଦ୍ଧା ପ୍ରାୟ ୨୮ ହଜାର ସ୍ଥାନରେ ନଡ଼ାପୋଡ଼ି ହୋଇଥିଲା । କିନ୍ତୁ ଚଳିତ ବର୍ଷ ଏହା ବୃଦ୍ଧି ପାଇଛି । ଏଥିରୁ ଅନୁମେୟ ଯେ, ଚଳିତ ବର୍ଷ ସବୁ ରେକର୍ଡ ଭାଙ୍ଗିବ ଦିଲ୍ଲୀର ବାୟୁ ପ୍ରଦୂଷଣ ।
ଗତ ୩ଦିନ ହେଲା ଦୈନିକ ପ୍ରାୟ ୧ହଜାର ନଡ଼ାପୋଡ଼ି ଘଟଣା ଘଟୁଥିଲା । କିନ୍ତୁ ରବିବାର ଏହି ସଂଖ୍ୟାରେ ୧ହଜାର ୮ଶହ ବୃଦ୍ଧି ଘଟିଛି, ଯାହାକି ଅତ୍ୟନ୍ତ ଚିନ୍ତାର ବିଷୟ । ତେବେ ଆଗକାଳରେ ଧାନକୁ ମୂଳରୁ କାଟି ଦିଆଯାଉଥିଲା । ନଡ଼ାକୁ ଜାଳେଣି, ଗୋରୁ ଖାଦ୍ୟ ବା ଛପର କାମରେ ବ୍ୟବହାର କରାଯାଉଥିଲା । କିନ୍ତୁ ବର୍ତ୍ତମାନ ଶସ୍ୟର ଅଗରୁ କେଣ୍ଡା କାଟି ନେଇ ସମ୍ପୂର୍ଣ୍ଣ ଜମିରେ ନିଆଁ ଲଗାଇଦିଆଯାଉଛି । ଫଳରେ ଚାଷୀମାନେ ଖୁବ କମ ଖର୍ଚ୍ଚରେ କ୍ଷେତକୁ ସଫା କରି ପରବର୍ତ୍ତୀ ଚାଷ ପାଇଁ ପ୍ରସ୍ତୁତ କରିପାରୁଛନ୍ତି ।
କିନ୍ତୁ ଏହି ନଡ଼ା ପୋଡ଼ିର ଗମ୍ଭୀର ପ୍ରଭାବ ପଡ଼ୁଛି ବାୟୁମଣ୍ଡଳ ଉପରେ । ଲୋକମାନେ ନିଶ୍ୱାସ ପ୍ରଶ୍ୱାସ ମଧ୍ୟ ନେଇପାରୁନାହାନ୍ତି । ପିଲାମାନଙ୍କ ଉପରେ ବି ଏହାର ଗମ୍ଭୀର ପ୍ରଭାବ ପଡ଼ୁଛି । ଦିଲ୍ଲୀ ସରକାର ଏଥିପାଇଁ ବହୁ ଅନୁରୋଧ ମଧ୍ୟ କରୁଛନ୍ତି । କିନ୍ତୁ ପଞ୍ଜାବ ଓ ହରିୟାଣା ସରକାର ନଡ଼ାପୋଡ଼ିକୁ ନିୟନ୍ତ୍ରଣ କରିପାରୁ ନାହାନ୍ତି ।
ରବିବାରର ନଡ଼ାପୋଡ଼ି ପରେ ସୋମବାର ଦିଲ୍ଲୀ ଓ ଲକ୍ଷ୍ନୌ ପରି ସହରରେ ବାୟୁମାନ ଅଧିକ ଖରାପ ହୋଇପଡ଼ିଥିଲା । ସେହିପରି ୪ ତାରିଖରେ ଦୀପାବଳି ଆସୁଥିବାରୁ ଦିଲ୍ଲୀ ଏୟାର ଏମର୍ଜେନ୍ସି ଆଡ଼କୁ ଗତି କରୁଛି ବୋଲି ବିଶେଷଜ୍ଞ ମାନେ ମତ ଦେଇଛନ୍ତି ।
ସେପଟେ ଆସନ୍ତା ସପ୍ତାହରେ ନଡ଼ାପୋଡ଼ି ଅଧିକ ବଢ଼ିବ । ବହୁ ସଂଖ୍ୟକ ନଡ଼ା ନପୋଡ଼ିବାକୁ ସେମାନେ କୃଷକଙ୍କୁ ଅନୁରୋଧ କରୁଛନ୍ତି । ତେବେ ଏଯାବତ ପ୍ରାୟ ୩ହଜାର କୃଷକଙ୍କୁ ନଡ଼ା ନପୋଡ଼ିବାକୁ ୨୫ଲକ୍ଷ ଟଙ୍କା ଜରିମାନା କରାଯାଇସାରିଲାଣି । ତଥାପି ଲୋକେ ସଚେତନ ହେଉନାହାନ୍ତି ।
