ସଇଁନ୍ତଳା (ବଡ଼ ଖବର ବ୍ୟୁରୋ): ଗରିବ ଲୋକଙ୍କ ଲାଗି ସରକାର ଘୋଷଣା କରିଛନ୍ତି ଆବାସ ଯୋଜନା । ପକ୍କାଘର ଥିବା ଲୋକଙ୍କୁ ମିଳୁଛି ପ୍ରଧାନମନ୍ତ୍ରୀ ଆବାସ ଯୋଜନା । ଯୋଗ୍ୟ ହିତାଧିକାରୀ କିନ୍ତୁ ଏହି ଯୋଜନାରୁ ବଞ୍ଚିତ । ବଲାଙ୍ଗୀର ଜିଲ୍ଲା ସଇଁନ୍ତଳା ବ୍ଲକ କନ୍ଧକେଇଗାଁ ପଞ୍ଚାୟତ ଜଲିଆଦର୍ହ ଗାଁରୁ ଆସିଛି ଏଭଳି ସଙ୍ଗୀନ ଅଭିଯୋଗ । ସରକାରଙ୍କ ଏହି ଲୋକପ୍ରିୟ ଯୋଜନାରୁ ବଞ୍ଚିତ ହିତାଧିକାରୀମାନେ ଜିଲ୍ଲାପାଳଙ୍କୁ ଭେଟି ଦାବିପତ୍ର ଦେଇଛନ୍ତି ।
ହିତାଧିକାରୀମାନେ ଅଭିଯୋଗରେ ଦର୍ଶାଇଛନ୍ତି ଯେ ରସିଦ ପାଇଥିଲେ ସୁଦ୍ଧା ପକ୍କାଘର ପାଇବାରୁ ବଞ୍ଚିତ । ଏନେଇ ପୂର୍ବରୁ ବିଡିଓଙ୍କୁ ଅଭିଯୋଗ କରିଥିଲେ ମଧ୍ୟ ସେ ଶୁଣିନଥିବା ଜିଲ୍ଲାପାଳଙ୍କ ଆଗରେ ଫେରାଦ ଦେଇଛନ୍ତି ଲୋକେ । ଜିଲ୍ଲାପାଳ ଏନେଇ ସମ୍ପୃକ୍ତ କାର୍ଯ୍ୟନିର୍ବାହୀ ଅଧିକାରୀଙ୍କୁ ଯୋଗାଯୋଗ କରିଥିଲେ । ତେବେ ପ୍ରକୃତ ହିତାଧିକାରୀଙ୍କୁ ଆବାସ ଯୋଜନା ମିଳିଥିବା ସଫେଇ ଦେଇଛନ୍ତି କାର୍ଯ୍ୟନିର୍ବାହୀ ଅଧିକାରୀ । ସେପଟେ ଅଭିଯୋଗକାରୀଙ୍କୁ ପକ୍କାଘର ଯୋଗାଇ ଦେବାର ପ୍ରତିଶ୍ରୃତି ଦେଇଛନ୍ତି ଜିଲ୍ଲାପାଳ । ଏବେ ଦେଖିବାକୁ ବାକି ରହିଲା କେବେ ଜିଲ୍ଲାପାଳ ତାଙ୍କ ପ୍ରତିଶ୍ରୁତି ରକ୍ଷା କରୁଛନ୍ତି ।
