ସମ୍ବଲପୁରରେ ଅନିର୍ଦ୍ଦିଷ୍ଟ କାଳ ପାଇଁ କର୍ଫ୍ୟୁ
ସମ୍ବଲପୁର (ବଡ଼ ଖବର ବ୍ୟୁରୋ): ଗତକାଲି ହନୁମାନ ଜୟନ୍ତୀ ଶୋଭାଯାତ୍ରାରେ ଘଟିଥିବା ଅଘଟଣ ଯୋଗୁଁ ସମ୍ବଲପୁର ସହରରେ ଅନିର୍ଦ୍ଦିଷ୍ଟ କାଳ ପାଇଁ କର୍ଫ୍ୟୁ ଜାରି କରାଯାଇଛି । ରାତି ୧୨ଟାରୁ କର୍ଫ୍ୟୁ ଜାରି ହୋଇଛି । ଅନିର୍ଦ୍ଦିଷ୍ଟ କାଳ ପାଇଁ କର୍ଫ୍ୟୁ ଜାରି କରିଛି ଜିଲ୍ଲା ପ୍ରଶାସନ । ସକାଳ ୮ରୁ ୧୦ଟା ଓ ଅପରାହ୍ନ ୩ଟା ୩୦ରୁ ୫ଟା ୩୦ ପର୍ଯ୍ୟନ୍ତ କର୍ଫ୍ୟୁ କୋହଳ ହୋଇଛି । ଏହି ସମୟରେ ଅତ୍ୟାବଶ୍ୟକ ସାମଗ୍ରୀ କିଣିପାରିବେ ଲୋକ ।
ସହରର ୬ଟି ସ୍ଥାନରେ କର୍ଫ୍ୟୁ ବଳବତ୍ତର ରହିଛି । ସହରରେ ୪୨ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହୋଇଛନ୍ତି । ହନୁମାନ ଜୟନ୍ତୀ ଗଣ୍ଡଗୋଳ ପରେ ଅପ୍ରୀତିକର ପରିସ୍ଥିତି ଏଡ଼ାଇବାକୁ ଜିଲ୍ଲା ପ୍ରଶାସନ ପକ୍ଷରୁ କଟକଣା ଜାରି ହୋଇଛି । ଗତ ରାତିରେ ସହରର ବିଭିନ୍ନ ସ୍ଥାନରେ ଭଙ୍ଗାରୁଜା, ଜଳାପୋଡା, ହତ୍ୟାକାଣ୍ଡ ଭଳି ଘଟଣା ଦେଖିବାକୁ ମିଳିଥିଲା ।
ଗୋଲବଜାରରେ ଦୁଇଟି ଫଳଦୋକାନ, ଗୋଟିଏ ରେଷ୍ଟୁରାଣ୍ଟ ,ସହ ଅନ୍ୟ ଦୁଇଟି ଦୋକାନରେ କେହି ନିଆଁ ଲଗାଇ ଦେଇଥିଲେ । ସହରରେ ପ୍ରାୟ ୧୦ ରୁ ଅଧିକ ଦୋକାନର ସାମ୍ନାକୁ ଭଙ୍ଗାଯାଇଥିବା ଦେଖିବାକୁ ମିଳିଛି । ୧୪୪ ଧାରା ଜାରି ସତ୍ତ୍ୱେ ଏପରି ସମାଗମ କେମିତି ଘଟିଲା ତାହା ଆଶ୍ଚର୍ଯ୍ୟ କରିଛି । ସହରରେ ଇଣ୍ଟରନେଟ ସେବା ବାତିଲ ରହିଛି । ଆଖଡା ଶୋଭାଯାତ୍ରା ସମୟରେ ଦଳେଇପଡା ନିକଟସ୍ଥ ରିଂ ରୋଡ଼ରେ ଛୁରି ଭୁଶି ଜଣଙ୍କୁ ହତ୍ୟା କରାଯାଇଛି ।