ଚାନ୍ଦବାଲି(ବଡ଼ ଖବର ବ୍ୟୁରୋ): ଭଦ୍ରକ ଜିଲ୍ଲା ତିହିଡି ବ୍ଲକ ଗୋବିନ୍ଦପୁର ପଞ୍ଚାୟତ ଅଧିନ ମଧୁପୁର ଜଳେଶ୍ଵର ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷାଦାନ ବାଧାପ୍ରାପ୍ତ। ପ୍ରତିବାଦରେ ଅବିଭାବକ ଓ ଛାତ୍ରଛାତ୍ରୀଙ୍କ ତାଲା ବନ୍ଦ ଆନ୍ଦୋଳନ। ଛାତ୍ରଛାତ୍ରୀଙ୍କ ସହ ବହୁ ଅବିଭାବକ ଆନ୍ଦୋଳନରେ ସାମିଲ ହୋଇ ବ୍ଲକ ଶିକ୍ଷା ବିଭାଗ ବିରୋଧରେ ବର୍ଷିଥିଲେ। ପ୍ରଧାନ ଶିକ୍ଷକ ପଦବୀ ଖାଲି ପଡିଥିବା ବେଳେ ଜଣେ ଡେପୁଟେସନରେ ସପ୍ତାହକୁ ଦୁଇଦିନ ଆସି କାମ ଚଳାନ୍ତି। ଆଉ ମାତ୍ର ୩ ଜଣ ଶିକ୍ଷକ ଓ ଶିକ୍ଷୟିତ୍ରୀ ପ୍ରଥମରୁ ସପ୍ତମ ଶ୍ରେଣୀ ପିଲାମାନଙ୍କୁ ପାଠ ପଢାନ୍ତି।
ସେଥିମଧ୍ୟରୁ ଏହି ୩ ଜଣ ପାଳି କରି ଆସନ୍ତି। ଯାହା ବାରମ୍ବାର ଅଭିଯୋଗ ହୋଇ ଆସୁଥିଲେ ମଧ୍ୟ ଫଳ ଶୂନ ରହିଛି । ଏହାଦ୍ବାରା ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧକାର ମଧ୍ୟକୁ ଠେଲି ହୋଇ ଯାଉଛି। ଯାହାକୁ ନେଇ ଅବିଭାବକମାନେ ଛାତ୍ରଛାତ୍ରୀଙ୍କ ସହ ଏପରି ପ୍ରତିବାଦ ଓ ଆନ୍ଦୋଳନ କରିଥିବା ସୂଚନା ମିଳିଛି। ଅନ୍ୟପଟେ ବ୍ଲକ ଶିକ୍ଷାଧିକାରୀ ଘଟଣା ସମ୍ପର୍କରେ ସମ୍ପୂର୍ଣ୍ଣ ଅବଗତ ଥାଇ ମଧ୍ୟ ତଦନ୍ତରେ ଯାଇନଥିବା ବଡ ବିଡମ୍ବନାର ବିଷୟ ସାଜିଛି। ତେବେ ଏପରି ଆନ୍ଦୋଳନ ଜାରି ରହିବ ବୋଲି ଅବିଭାବକ ମାନଙ୍କ ପକ୍ଷରୁ ଚେତାବନୀ ଦିଆ ଯାଇଛି।
