ମଣିପୁର ହିଂସା, ୧୦ ଦିନ ଯାଏଁ ଇଣ୍ଟରନେଟ ସେବା ବନ୍ଦ
ଇମ୍ଫାଲ (ବଡ଼ ଖବର ବ୍ୟୁରୋ): ଥମିବାରେ ନା ନେଉ ନାହିଁ ମଣିପୁର ହିଂସା । କିଛି ଦିନ ତଳେ ହିଂସା କମିଥିବାବଳେ ପୁଣି ଏବେ ଉତ୍ତେଜନା ଦେଖିବାକୁ ମିଳିଛି । ଉତ୍ତେଜନାକୁ ଦୃଷ୍ଟିରେ ରଖି ମଣିପୁରରେ ଜୁନ ୧୦ ପର୍ଯ୍ୟନ୍ତ ଇଣ୍ଟରନେଟ୍ ନିଷେଧାଦେଶ ଜାରି ରହିବ। ମଣିପୁର ସରକାର ଏହି ନିଷ୍ପତ୍ତି ନେଇଛନ୍ତି। ଏହାପୂର୍ବରୁ ହିଂସା ଆରମ୍ଭ ହେବା ପରେ ପ୍ରଥମେ ମେ’ ୩ରେ ଇଣ୍ଟରନେଟ୍ ଉପରେ ପ୍ରତିବନ୍ଧକ ଲଗାଯାଇଥିଲା ଯାହା ବର୍ତ୍ତମାନ ଜୁନ ୧୦ ପର୍ଯ୍ୟନ୍ତ ବୃଦ୍ଧି କରାଯାଇଛି।
ଇଣ୍ଟରନେଟ ଉପରେ ପ୍ରତିବନ୍ଧକ ଜୁନ୍ ୧୦ ତାରିଖ ଅପରାହ୍ନ ୩ଟା ପର୍ୟ୍ୟନ୍ତ ବଳବତ୍ତର ରହିବ। ସେପଟେ ଯେକୌଣସି ପରିସ୍ଥିତିର ମୁକାବିଲା ପାଇଁ ସମଗ୍ର ମଣିପୁରରେ ଏବଂ ବିଶେଷ କରି ହିଂସା ପ୍ରଭାବିତ ଅଞ୍ଚଳରେ ଭାରୀ ସୁରକ୍ଷାବାହିନୀ ମୁତୟନ କରାଯାଇଛି।
