ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆଜି ସଂସଦରେ ମୌସୁମୀ ଅଧିବେଶନର ତୃତୀୟ ଦିନ । ଶୁକ୍ରବାରଠୁ ଅଚଳ ଥିଲା ଗୃହ । ଆଜ ପୂର୍ବାହ୍ନ ୧୧ଟାରେ କାର୍ଯ୍ୟ ଆରମ୍ଭ ହେବ । ଆଜି ମଧ୍ୟ ମଣିପୁର ବର୍ବରତାକୁ ନେଇ ହୋଇପାରେ ହଙ୍ଗାମା । ମଣିପୁରରେ ଦୁଇ କୁକି ସଂପ୍ରଦାୟର ମହିଳାଙ୍କୁ ନିବସ୍ତ୍ର ଘଟଣାକୁ ନେଇ ଜୋର ଧରିଛି ରାଜନୀତି । କେନ୍ଦ୍ର ସରକାରଙ୍କୁ ଘେରିବାକୁ ରଣନୀତି କରିଛନ୍ତି ବିରୋଧୀ । ଏହି ପ୍ରସଙ୍ଗରେ ସଂସଦରେ ଆଲୋଚନା କରିବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଂସଦରେ ବୟାନ ଦିଅନ୍ତୁ ବୋଲି ବିରୋଧୀ ଦଳର ନେତା ଦାବି କରିଛନ୍ତି ।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଟୁଇଟ କରି ଲେଖିଛନ୍ତି, ସଂସଦର ଦୁଇ ସଦନରେ ଅଚଳାବସ୍ଥା ପାଇଁ ସରକାର ଦାୟୀ । ମଣିପୁର ବର୍ବରତାକୁ ନେଇ ସାରା ଦେଶ ଆଲୋଚନା କରୁଛି । ହେଲେ ସରକାର ଆଲୋଚନା କରିବାକୁ ଚାହୁଁ ନାହାନ୍ତି । କେନ୍ଦ୍ର ସରକାର ମଣିପୁର ପ୍ରସଙ୍ଗକୁ ଗମ୍ଭୀରତାର ସହ ନେଇଥିଲେ ସଂସଦରେ ଆଲୋଚନା କରିବାକୁ ରାଜି ହୁଅନ୍ତେ ।
