ବ୍ଲାଷ୍ଟିଂ ବନ୍ଦ ନହେବା ପର୍ଯ୍ୟନ୍ତ ଆନ୍ଦୋଳନ

ଦଶପଲ୍ଲା, (ବଡ଼ ଖବର ବ୍ୟୁରୋ): ପଥର ବ୍ଲାଷ୍ଟିଂରେ ଥରୁଛି ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ତୋଣ୍ଡାବାଡ଼ି ପଞ୍ଚାୟତର ୪ ଗାଁ । ପ୍ରାୟ ଦୁଇ ହଜାର ଲୋକ ନାହିଁ ନଥିବା ଅସୁବିଧା ଭୋଗୁଛନ୍ତି । ବାରମ୍ବାର ଅଭିଯୋଗ କଲେ ମଧ୍ୟ ପ୍ରଶାସନ ଶୁଣୁନାହିଁ । ବାଧ୍ୟ ହୋଇ ଗାଁ ଲୋକେ ଶାନ୍ତିପୂର୍ଣ୍ଣ ଆନ୍ଦୋନକୁ ଆପଣେଇଛନ୍ତି । ପଥର ବ୍ଲାଷ୍ଟିଂକୁ ବିରୋଧ କରି ଆଜି ବ୍ଲାଷ୍ଟିଂ ୟୁନିଟ ସମ୍ମୁଖରେ ଧରଣାରେ ବସିଛନ୍ତି ଗାଁ ଲୋକ । ସୂଚନା ଅନୁଯାୟୀ ତୋଣ୍ଡାବାଡ଼ି ପଞ୍ଚାୟତର ପଙ୍କଳସାହି ମଳିକ ପାହାଡ଼କୁ ଣ.ୠ.ଉ ନାମକ ଏକ ଘରୋଇ କମ୍ପାନି ଲିଜ ନେଇ ପଥର ବ୍ଲାଷ୍ଟିଂ କରୁଛି । ବ୍ଲାଷ୍ଟିଂର ପ୍ରବଳ ଶବ୍ଦରେ ପକ୍କାଘର ନଷ୍ଟ ହେବା ସହ କଚ୍ଚାଘରଗୁଡ଼ିକ ଭୁଶୁଡ଼ି ପଡୁଥିବା ଅଭିଯୋଗ ହୋଇଛି । ଏନେଇ ବାରମ୍ବାର ପ୍ରଶାସନ ନିକଟରେ ଗୁହାରୀ କଲେ ମଧ୍ୟ କେହି ଶୁଣୁନଥିବା କହିଛନ୍ତି ଗ୍ରାମବାସୀ । ଖବର ପାଇ ଦଶପଲ୍ଲା ପୋଲିସ ଘଟଣାସ୍ଥଳରେ ପହଁଚି ଲୋକଙ୍କୁ ବୁଝାସୁଝା କରିବା ପରେ ମଧ୍ୟ ଲୋକେ ଧାରଣାରେ ବସିଛନ୍ତି । ପଥର ବ୍ଲାଷ୍ଟିଂ ବନ୍ଦ ନହେବା ପର୍ଯ୍ୟନ୍ତ ଧାରଣା ଚାଲୁ ରହିବ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।