ଇଣ୍ଡିଆ ଭାରତ ହେଲେ ଡଟ ଇନରେ ଆସିପାରେ ସମସ୍ୟା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ):ଦେଶର ନାଁ ବଦଳିଲେ କ’ଣ ହେବ ପରିବର୍ତ୍ତନ? ଇଣ୍ଡିଆ ଭାରତ ହେଲେ ଅନଲାଇନ ୱେବ୍ସାଇଟ୍ ଉପରେ ମଧ୍ୟ ପଡିବ ପ୍ରଭାବ । ଦେଶର ପରିଚୟ .ଇନରୁ ଜଣାଯାଇଥାଏ । ଭାରତ ହେଲେ ଏହାର ନାଁ କ’ଣ ରହିବ? ଇଣ୍ଡିଆ-ଭାରତକୁ ନେଇ ଚାଲିଥିବା ମହାଭାରତ ଥମିବାରେ ନାଁ ନେଉନି । ସାରା ଦେଶରେ ଏବେ ଏହି ପ୍ରସଙ୍ଗକୁ ନେଇ ଚର୍ଚ୍ଚା । କ’ଣ ହେବ ଦେଶର ନାଁ? ଗୋଟେ ପେଟ ଏନେଇ ରାଜନୀତି ସରଗରମ ହୋଇଥିବା ବେଳେ ଅନ୍ୟପଟେ ଇଂଟରନେଟ ଦୁନିଆରେ ମଧ୍ୟ ଏହାର ପ୍ରଭାବ ପଡିପାରେ ବୋଲି ଚର୍ଚ୍ଚା ହେଉଛି ।

କୁହାଯାଉଛି ଯେ ଯଦି ଇଣ୍ଡିଆର ନାଁ ବଦଳି ଭାରତ ହୁଏ, ତେବେ ଡଟ ଇନ (. ଇନ) ୱେବ୍ସାଇଟ ଉପରେ ପ୍ରଭାବ ପକାଇବ । ଯାହା ଫଳରେ ଅନଲାଇନ ବ୍ୟବସାୟ ମଧ୍ୟ ବାଧାପ୍ରାପ୍ତ ହେବ । ଡଟ ଇନ ହେଉଛି ଏକ ସିସିଟିଏଲଡି ବା କଂଟ୍ରି କୋଡ ଟପ୍ ଲେୟର ଡୋମେନ ଯାହା ଦେଶର ନାଁ ଅନୁସାରେ ରେଜିଷ୍ଟର ହୋଇଥାଏ । ଯାହା ଜଣାଇଦିଏ ଯେ .ଇନ ବ୍ୟବହାର କରୁଥିବା ୱେବ୍ସାଇଟ ଇନରେଜିଷ୍ଟ୍ରିରେ ପଂଜିକୃତ । .ଇନରେ କେତେକ ସବଡୋମେନ ମଧ୍ୟ ରହିଛି ଯାହା କିଛି ନିର୍ଦ୍ଦିଷ୍ଟ କ୍ଷେତ୍ରରେ ବ୍ୟବହାର କରାଯାଇଥାଏ । ଭାରତ ପାଇଁ .ଇନ, ଚାଇନା ପାଇଁ .ସିଏନ, ଆମେରିକାରେ .ୟୁଏସ, ୟୁକେ ପାଇଁ ଏହି ୱେବ୍ସାଇଟ .ୟୁକେ ଭାବେ ଜଣାଯାଏ ।

ଯେମିତିକି ଭାରତ ସରକାରଙ୍କ ଗଭ୍.ଇନ, ଭାରତୀୟ ମିଲିଟାରୀର ମିଲ୍.ଇନ ୱେବ୍ସାଇଟରେ ଏହାକୁ ବ୍ୟବହାର କରାଯାଏ । ଇଂରାଜୀରେ ଦେଶର ନାଁ ଇଣ୍ଡିଆ ଥିବାରୁ ଏପରି ଲେଖାଯାଇଥାଏ । କିନ୍ତୁ ଯଦି ଏହି ନାଁ ବଦଳି କରାଯାଇ ଭାରତ ହୁଏ, ତେବେ ଆସିପାରେ ସମସ୍ୟା । କାରଣ ଭାରତ ରହିଲେ ୱେବ୍ସାଇଟରେ ଦେଶର ନାଁ ଅନୁଯାୟୀ .ବିଆର କିମ୍ବା ବିଏଚ ନଚେତ୍ .ବିଟି ଲେଖାଯିବ । କିନ୍ତୁ ପୂର୍ବରୁ ବାହାରିନ ଦେଶ ପାଇଁ ଏହି .ବିଏଚ ବ୍ୟବହାର କରାଯାଏ ।

.ବିଆର ବ୍ରାଜିଲକୁ ବୁଝାଉଥିବା ବେଳେ .ବିଟି ଭୁଟାନ ପାଇଁ ପରିଚିତ । ଯଦି ଏହି ନାମକରଣରେ ଆଗକୁ ମୋହର ବାଜେ ତେବେ ୱେବ୍ସାଇଟରେ ଅକ୍ଷର ସଂଖ୍ୟାକୁ ବଢାଇ .ଭାରତ କିମ୍ବା .ବିଏଚଆରଟି କରିବାକୁ ହେବ । ଏହା ବ୍ୟତୀତ ବିଭିନ୍ନ ସଂସ୍ଥା ମଧ୍ୟ ଏଥିରେ ଫଶିବାର ସମ୍ଭାବନା ରହିଛି । ଆଜିକାଲିର ଡିଜିଟାଲ ଯୁଗରେ ସବୁକିଛି ଅନଲାଇନ ମାଧ୍ୟମରେ ହେଉଥିବାରୁ .ଇନର ସମସ୍ୟା ଅର୍ଥନୀତି ଉପରେ ମଧ୍ୟ ପଡିବ ।