ନାଙ୍ଗରହାର(ବଡ଼ ଖବର ବ୍ୟୁରୋ): ଆଫଗାନିସ୍ତାନର ପୂର୍ବ ନାଙ୍ଗରହାର ପ୍ରଦେଶରେ ପାକିସ୍ତାନ ଯିବା ପାଇଁ ଭିସା ପାଇବାକୁ ବୁଧବାର ହଜାର ହଜାର ଆଫଗାନିସ୍ତାନ ନାଗରିକ ଏକ ଷ୍ଟାଡିୟମରେ ମିଳିତ ହୋଇଥିଲେ । ଭିସା ପାଇବା ପାଇଁ ଲୋକଙ୍କ ମଧ୍ୟରେ ଆରମ୍ଭ ହୋଇଯାଇଥିଲା ପ୍ରତିଯୋଗିତା । ପ୍ରବଳ ଠେଲାପେଲା ହୋଇଥିଲା । ଏଡି ସମୟରେ କିଛି ଲୋକ ତଳେ ପଡିଯାଇଥିଲେ । ଦଳାଚକଟାରେ ଶ୍ୱାସରୁଦ୍ଧ ହୋଇ ୧୫ଜଣଙ୍କର ମୃତ୍ୟୁ ହୋଇଛି । ଏମାନଙ୍କ ମଧ୍ୟରେ ୧୧ଜଣ ମହିଳା ଅଛନ୍ତି ।
ରାଜ୍ୟପାଳ ଅତୁଲ୍ଲା ଖୋଗାନି କହିଛନ୍ତି ଯେ ଭିସା ପାଇବା ପାଇଁ ଲୋକଙ୍କ ମଧ୍ୟରେ ହୋଇଥିବା ପ୍ରତିଯୋଗଗିତା ହିଁ ୧୫ଜଣଙ୍କ ମୃତ୍ୟୁର କାରଣ ହେଲା । ସେ କହିଛନ୍ତି ଯେ ମୃତ ମହିଳାଙ୍କ ମଧ୍ୟରେ ଅଧିକାଂଶ ବୃଦ୍ଧ।
ବୁଧବାର ଅନ୍ୟ ଏକ ଘଟଣାରେ ଉତ୍ତର ଆଫଗାନିସ୍ତାନରେ ତାଲିବାନ ଆକ୍ରମଣରେ ୩୪ ଆଫଗାନିସ୍ତାନ ପୋଲିସ କର୍ମଚାରୀ ପ୍ରାଣ ହରାଇଛନ୍ତି । ଏହି ଆକ୍ରମଣରେ ଅନ୍ୟ ୮ଜଣ ସୁରକ୍ଷା କର୍ମୀ ଆହତ ହୋଇଥିବା ତାଖର ପ୍ରଦେଶର ମୁଖ୍ୟ ଡାକ୍ତରଖାନାର ନିର୍ଦ୍ଦେଶକ ରହିମ ବାଖୀଶ ଡାନିଶ କହିଛନ୍ତି।
