ବର୍ଷା ଭାଙ୍ଗିଦେଲା ସୁଖ ସପନ

ବୀରମହାରାଜପୁର (ବଡ଼ ଖବର ବ୍ୟୁରୋ): ଲଘୁଚାପ ବର୍ଷା ଅମଳ ହେବାକୁ ଥିବା ଫସଲ ଉଜାଡି ଦେଇଛି । ବିଭିନ୍ନ ସ୍ଥାନରେ ନଷ୍ଟ ହୋଇଛି ଶହ ଶହ ଏକର ଜମିରେ ହୋଇଥିବା ଫସଲ । ମୁଖ୍ୟତଃ ଧାନ କିଆରିରେ ପାଣି ଜମିରହିବାରୁ ଧାନ ଗଜା ହୋଇଯାଇଛି । ଫସଲ ଅମଳର ଶେଷ ପର୍ଯ୍ୟାୟରେ ଅଦିନିଆ ଲଘୁଚାପ ବର୍ଷା ଚାଷୀଙ୍କ ଚିନ୍ତା ବଢାଇ ଦେଇଛି ।

ଯୁଜୁମୁରା ବ୍ଲକ ଉପକଣ୍ଠ ଡ଼ଙ୍ଗରପଡା ପଞ୍ଚାୟତ ହିରୋ ଗାଁର ଚାଷୀ ମୃତ୍ୟୁଞ୍ଜୟ ପ୍ରଧାନଙ୍କ ଧାନ ଫସଲ ଅଦିନିଆ ଲଘୁଚାପ ବର୍ଷାରେ ଧୋଇ ହୋଇଯାଇଛି । ଧାନ କିଆରିରେ ପାଣି ଜମିବା ସହ ସମସ୍ତ ଧାନ ଗଜା ହୋଇଯାଇଛି । ଅଦିନିଆ ବର୍ଷାରେ ଚାଷୀ ମୃତ୍ୟୁଞ୍ଜୟଙ୍କ ୩.୫ ଏକର ଜମିରେ ହୋଇଥିବା ଧାନ ନଷ୍ଟ ହୋଇଯାଇଛି । ସେ ଚାଷ ପାଇଁ ଋଣ କରିଥିଲେ । ଏବର୍ଷ ଚାଷ ଭଲ ହୋଇଥିବାରୁ ଅମଳ ମଧ୍ୟ ଭଲ ହେବ ବୋଲି ସେ ଆଶା ରଖିଥିଲେ । କିନ୍ତୁ ଅଦିନିଆ ବର୍ଷା ସବୁକିଛି ଛଡେଇ ନେଇଛି । ମୃତ୍ୟୁଞ୍ଜୟଙ୍କ ସହ ତାଙ୍କ ଗାଁର ବିଭିନ୍ନ ଚାଷୀଙ୍କ ଫସଳ ଖାଇଯାଇଛି ଅଦିନିଆ ବର୍ଷା । ହିରୋ ଗ୍ରାମକୁ କୃଷି ବିଭାଗ ତରଫରୁ କିଛି ଅଧିକାରୀ ଆସି ନଷ୍ଟ ହୋଇଥିବା ଜମିରେ ବୁଲି ଅନୁଧ୍ୟାନ କରି କ୍ଷୟକ୍ଷତିର ଆକଳନ କରିଛନ୍ତି । ପ୍ରଶାସନ ତରଫରୁ କେବେ ସରକାରୀ ସହାୟତା ଘୋଷଣା ହେବ କ୍ଷତିଗ୍ରସ୍ତ ଚାଷୀମାନେ ଅପେକ୍ଷା କରିଛନ୍ତି ।