ଇସ୍ତଫା ଦେବେ ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର !

ହରିୟାଣା (ବଡ଼ ଖବର ବ୍ୟୁରୋ): ହରିୟାଣା ରାଜନୀତିରୁ ଏକ ବଡ଼ ଖବର ସାମ୍ନାକୁ ଆସୁଛି । ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ନିଜ ପଦରୁ ଇସ୍ତଫା ଦେବେ । ବର୍ତ୍ତମାନ ସଞ୍ଜୟ ଭାଟିଆ ଏବଂ ନାଏବ ସୌନି ମୁଖ୍ୟମନ୍ତ୍ରୀ ଦୌଡ଼ରେ ଅଛନ୍ତି। ଆହୁରି ମଧ୍ୟ ଶୁଣିବାକୁ ମିଳୁଛି ଯେ ହରିୟାଣାର ବିଜେପି ସରକାରଙ୍କ କ୍ୟାବିନେଟ ଆଜି ସାମୂହିକ ଭାବେ ଇସ୍ତଫା ଦେଇପାରନ୍ତି । ଏହାପରେ ସରକାରଙ୍କ ମନ୍ତ୍ରିମଣ୍ଡଳ ନୂତନ ଭାବେ ଗଠନ କରାଯିବ ।

ଜନନାୟକ ଜନତା ପାର୍ଟିକୁ କ୍ୟାବିନେଟରୁ ଅଲଗା କରିବା ପାଇଁ ରଣନୀତି ପ୍ରସ୍ତୁତ କରାଯାଇଛି । ଏହାର ଅର୍ଥ ହେଉଛି, ବର୍ତ୍ତମାନ ହରିୟାଣାରେ ବିଜେପି ଏବଂ ଜେଜେପି ମଧ୍ୟରେ କୌଣସି ମେଣ୍ଟ ରହିବ ନାହିଁ । ନୂଆ ମନ୍ତ୍ରିମଣ୍ଡଳରେ ଜେଜେପି ସାମିଲ ହେବ ନାହିଁ । ଆସନ୍ତା ଲୋକସଭା ନିର୍ବାଚନ ଭିତରେ ହରିୟାଣାରେ ବିଧାନସଭା ନିର୍ବାଚନ କରିବାକୁ ପ୍ରସ୍ତୁତି ଚାଲିଛି ।

ଲୋକ ସଭା ନିର୍ବାଚନ ପୂର୍ବରୁ ମଙ୍ଗଳବାର ହରିୟାଣା ବିଜେପିର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବାକୁ ଯାଉଛି। ପୂର୍ବାହ୍ନ ୧୧.୩୦ ସମୟରେ ଚଣ୍ଡିଗଡ଼ର ହରିୟାଣା ନିବାସରେ ମୁଖ୍ୟମନ୍ତ୍ରୀ ମନୋହର ଲାଲଙ୍କ ଅଧ୍ୟକ୍ଷତାରେ ବିଧାନସଭା ପାର୍ଟି ବୈଠକ ଅନୁଷ୍ଠିତ ହେବ। ଏହ ବୈଠକରେ ସମସ୍ତ ବିଜେପି ବିଧାୟକ ଓ ମନ୍ତ୍ରୀ ଉପସ୍ଥିତ ରହିବେ। ଏହା ବ୍ୟତୀତ ବିଜେପି ସମର୍ଥିତ ସ୍ବାଧୀନ ବିଧାୟକମାନେ ମଧ୍ୟ ଏହି ସଭାରେ ଯୋଗଦେବେ।