‘କଂଗ୍ରେସ ଏବେ ଏକମାତ୍ର ବିକଳ୍ପ’
ଧର୍ମଶାଳା (ବଡ଼ ଖବର ବ୍ୟୁରୋ): ପଦ୍ମ ଛାଡି ହାତ ଧରିଲେ ପୂର୍ବତନ ଜିଲ୍ଲା ପରିଷଦ ପ୍ରାର୍ଥୀ। ଯାଜପୁର ଜିଲ୍ଲା ୨୦୨୨ ରେ ଯାଜପୁର ଜିଲ୍ଲାର ଧର୍ମଶାଳା ନିର୍ବାଚନମଣ୍ଡଳିର ୧୫ନଂ ଜୋନରୁ ଜିଲା ପରିଷଦ ସଦସ୍ୟ ପ୍ରାର୍ଥୀ ଭାବରେ ବିଜେପିରୁ ଲଢେ଼ଇ କରି ପରାଜିତ ହୋଇଥିବା ପୂର୍ଣ୍ଣଚନ୍ଦ୍ର ତରାଇ ଏବେ ପଦ୍ମ ଛାଡି ହାତ ଧରିଛନ୍ତି। ଶ୍ରୀ ତରାଇଙ୍କୁ ଉପ ନିର୍ବାଚନରେ ଦଳ ପ୍ରାର୍ଥୀ ନ କରିବାରୁ ସେ ବିଜେଡିକୁ ଚାଲି ଯାଇଥିଲେ। ପରେ ସେଠାରେ କୋଣ ଠେସା ହେବାରୁ ହିମାଂଶୁଙ୍କ ନେତୃତ୍ଵରେ ବିଜେପିକୁ ଫେରି ଆସିଥିଲେ। ନିର୍ବାଚନ ଆଉ ମାତ୍ର କେଇଟା ଦିନ ବାକି ଥିବା ବେଳେ ଏବେ କିସାନ ପଣ୍ଡାଙ୍କ ନେତୃତ୍ଵରେ ପୁଣି ନିଜ ପୁରୁଣା ଘର କଂଗ୍ରେସକୁ ଫେରିଛନ୍ତି।
ଧର୍ମଶାଳା ନିର୍ବାଚନମଣ୍ଡଳିରେ ଚଳିତ ଥର ପ୍ରାର୍ଥୀ ହୋଇଥିବା ବିଜେଡି ଓ ବିଜେପି ପ୍ରାର୍ଥୀ ଗୋଟିଏ ଭାଡ଼ିର ପାରା ହୋଇଥିବା ବେଳେ ଉଭୟ ଧର୍ମଶାଳାକୁ ଲୁଟିବାକୁ ଭିତିରି ବୁଝାବଣା କରିଛନ୍ତି ବୋଲି ମିଶ୍ରଣ ପର୍ବରେ କିସାନ ଆକ୍ଷେପ କରିବା ସହିତ ତାଙ୍କୁ ସମର୍ଥନ କରିବାକୁ ନିବେଦନ କରିଛନ୍ତି। ଜାରକା କାର୍ଯ୍ୟାଳୟ ରେ ଏକ ମିଶ୍ରଣ ପର୍ବରେ ସାମ୍ବାଦିକମାନଙ୍କୁ ସମ୍ବୋଧିତ କରି ଏଭଳି କହିଛନ୍ତି କଂଗ୍ରେସ ପ୍ରାର୍ଥୀ କିସାନ ପଣ୍ଡା। କଂଗ୍ରେସ ଦଳ ଏବେ ଏକମାତ୍ର ବିକଳ୍ପ ଭାବି ସେ ପୁନର୍ବାର ଦଳକୁ ଫେରିଥିବା ପୂର୍ଣ୍ଣ କହିଛନ୍ତି।