୧୧ ଜିଲ୍ଲାକୁ ୟେଲୋ ୱାର୍ଣ୍ଣିଂ

ଭୁବନେଶ୍ୱର (ବଡ଼ ଖବର ବ୍ୟୁରୋ): ଦକ୍ଷିଣ ଆନ୍ଧ୍ର ଓ ଉତ୍ତର ତାମିଲନାଡ଼ୁ ମୁହାଁ ୱେଲମାର୍କଡ ଲୋ-ପ୍ରେସର।  ଆଜି ଦୁର୍ବଳ ହୋଇ ପୁଣି ଲଘୁଚାପରେ ପରିଣତ ହୋଇପାରେ । ତେବେ ଏହାର ପ୍ରଭାବରେ ଆଜି ଦକ୍ଷିଣ ଓଡ଼ିଶାର ୧୧ ଜିଲ୍ଲାରେ ମଧ୍ୟମ ଧରଣ ବର୍ଷା ହେବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ। ଏଥିପାଇଁ ଦକ୍ଷିଣ ଓ ଉପକୂଳ ୧୧ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି । ଏହାପରେ ୨୬ ବେଳକୁ ଦ୍ବିତୀୟ ଓ ୨୯ ବେଳକୁ ତୃତୀୟ ଲଘୁଚାପ ସୃଷ୍ଟି ହେବ ବୋଲି ଆକଳନ କରିଛନ୍ତି ପାଣିପାଗ ବିଜ୍ଞାନୀ। ତେବେ ଦ୍ବିତୀୟ ଲଘୁଚାପ ବେଶୀ ଘନୀଭୂତ ହୋଇପାରେ। ଯାହା ୨୬ ଓ ୨୭ ବେଳକୁ ସୃଷ୍ଟି ହେଇପାରେ। ଲଘୁଚାପ ସଂପର୍କରେ ଏଯାଏଁ IMD ପକ୍ଷରୁ ସ୍ପଷ୍ଟ କରାଯାଇନାହିଁ।

ଲଘୁଚାପର ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ  ସ୍ୱଳ୍ପରୁ ମଧ୍ୟମ ପରିମାଣର ବର୍ଷା ହୋଇଛି । ଗତ ୨୪  ଘଣ୍ଟାରେ ଖୋର୍ଦ୍ଧାରେ ୬୦ମିମି, ବଲାଙ୍ଗୀର ସଇଁତଳାରେ  ୬୦, ନୟାଗଡ଼ ଓଡ଼ଗାଁରେ ୬୦, କନ୍ଧମାଳ କଳିଙ୍ଗାରେ  ୪୦, ଖୋର୍ଦ୍ଧା ଟାଙ୍ଗୀରେ ୪୦, କଳାହାଣ୍ଡି ଲାଞ୍ଜିଗଡ଼ରେ ୩୦, ରାୟଗଡ଼ା ଅମ୍ବାଡୋଲାରେ ୩୦, ନୟାଗଡ଼ ରଣପୁରରେ ୨୦,  ବଲାଙ୍ଗୀର ଟିଟିଲାଗଡ଼ରେ ୨୦, ବଲାଙ୍ଗୀର ଗୁଡଭେଲାରେ  ୨୦, ଖୋର୍ଦ୍ଧା ଚିଲିକାରେ ୨୦ମିମି ବର୍ଷା ରେକର୍ଡ ହୋଇଛି ।  ଗୁରୁବାର ଉପକୂଳ ଓଡ଼ିଶା ଓ ଦକ୍ଷିଣ ଓଡ଼ିଶାର କିଛି  ସ୍ଥାନରେ ସ୍ୱଳ୍ପ ଓ ମଧ୍ୟମ ପରିମାଣର ବର୍ଷା ହୋଇପାରେ ।  ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି,  ରାୟଗଡ଼ା, କୋରାପୁଟ, ମାଲକାନଗିରି, କନ୍ଧମାଳ,  କଳାହାଣ୍ଡି ଓ ନବରଙ୍ଗପୁରରେ ଘଡ଼ଘଡ଼ି ସହ ବର୍ଷା  ହୋଇପାରେ ବୋଲି ପାଣିପାଗ ବିଭାଗ ଆକଳନ କରିଛି ।