ଗାଁ ରାସ୍ତାରେ ଜଳିଲା ୮ଶହ ଦୀପ

ଚାନ୍ଦବାଲି (ବଡ଼ ଖବର ବ୍ୟୁରୋ): ମହାମାରୀ କରୋନା ପାଇଁ ଏ ବର୍ଷ ଫିକା ପଡିଛି ଆଲୋକର ପର୍ବ ଦୀପାବଳି । ନ ଥିଲା ବାଣ-ରୋଷଣୀର ଶବ୍ଦ । ସହରଠାରୁ ଗାଁ ପର୍ଯ୍ୟନ୍ତ ସବୁଆଡେ ଖାଁ ଖାଁ ପରିବେଶ । ଛକ ଛକରେ ପୋଲିସର କଡା ପ୍ରହରା । କେବଳ ଦୀପରେ ପାଳନ ହୋଇଛି ଏ ବର୍ଷର ଦୀପାବଳି । ଭଦ୍ରକ ଜିଲ୍ଲା ତିହିଡି ବ୍ଲକ ନରେନ୍ଦ୍ରପୁର ଗାଁ ନିୟୁ ଷ୍ଟାର କ୍ଲବର ଯୁବକମାନେ ଏକ ନିଆରା ଢଙ୍ଗରେ ପାଳନ କରିଛନ୍ତି ଦୀପାବଳି ।

ନିଜ ଗାଁ ରାସ୍ତାର ଦୁଇ ପାର୍ଶ୍ଵରେ ମାଟିରେ ତିଆରି ୮ଶହ ଦୀପଜାଳି ପାଳନ କରିଛନ୍ତି ଆଲୋକର ପର୍ବ । ଉକ୍ତ ଗାଁର ଛୋଟ ଛୋଟ ପିଲାମାନେ ମଧ୍ୟ ସେମାନଙ୍କୁ ସହଯୋଗ କରୁଥିବାର ଦେଖାଯାଇଥିଲା । ଯୁବକମାନେ ସରକାରଙ୍କ ନିୟମ ମାନି ବାଣ ନ ଫୁଟାଇବାକୁ ଗ୍ରାମବାସୀମାନଙ୍କୁ ଅନୁରୋଧ କରିଥିଲେ । ଯୁବକମାନଙ୍କର ଏପରି କାର୍ଯ୍ୟକୁ ଗ୍ରାମବାସୀ ପ୍ରଶଂସା କରିଛନ୍ତି ।