ମନ୍ଦିର ବନ୍ଦ ପ୍ରସଙ୍ଗରେ ମୁହଁ ଖୋଲିଲେ ଶଙ୍କରାଚାର୍ଯ୍ୟ

ପୁରୀ/ଧର୍ମଶାଳା (ବଡ଼ ଖବର ବ୍ୟୁରୋ): କରୋନା ମହାମାରୀ ଯୋଗୁ ରାଜ୍ୟର ସମସ୍ତ ମନ୍ଦିର ବନ୍ଦ ରହିଛି । ଫଳରେ ଅନେକ ଜୀବିକା ହରାଇ ବସିଛନ୍ତି । ଶ୍ରୀମନ୍ଦିର ସମେତ ଅନ୍ୟାନ୍ୟ ଦେବାଦେବୀ ମନ୍ଦିରରେ ଭକ୍ତଙ୍କ ପ୍ରବେଶ ଉପରେ ରୋକ୍ ଲାଗିଥିବାରୁ ସେବାୟତମାନେ ଦୀର୍ଘ ମାସ ଧରି ଅସୁବିଧା ଭୋଗିବା ସହ ପରିବାର ପ୍ରତିପୋଷଣ କରିବାରେ ଅସମର୍ଥ ହୋଇଛନ୍ତି । ତୁରନ୍ତ ମନ୍ଦିର ଖୋଲିବା ଦାବିରେ ସେବାୟତମାନେ ବିଭିନ୍ନ ମନ୍ଦିର ସମ୍ମୁଖରେ ଘଣ୍ଟ ବାଡ଼େଇ ପ୍ରତିବାଦ କରିଛନ୍ତି । ହେଲେ ସରକାର ଏପର୍ୟ୍ୟନ୍ତ କୌଣସି ନିଷ୍ପତ୍ତି ନେଇନାହାନ୍ତି । ତେବେ ଜଗତଗୁରୁ ଶଙ୍କରାଚାର୍ୟ୍ୟ ଆଜି ଏହି ପ୍ରସଙ୍ଗରେ ମୁହଁ ଖୋଲିଛନ୍ତି । ସରକାର ସେବାୟତମାନଙ୍କ ସମସ୍ୟାକୁ ଗୁରୁତ୍ୱର ସହ ଗ୍ରହଣ କରିବାକୁ ଜଗତଗୁରୁ ମତ ରଖିଛନ୍ତି । ସେବାୟତ ପରିବାରର ଭରଣପୋଷଣ ନିମନ୍ତେ ରାଜ୍ୟ ସରକାର ଉଚିତ ପଦକ୍ଷେପ ଗ୍ରହଣ କରିବାକୁ ଶଙ୍କରାଚାର୍ୟ୍ୟ ପରାମର୍ଶ ଦେଇଛନ୍ତି । ଅନ୍ୟପଟେ ମନ୍ଦିର ଖୋଲିବା ଦାବିରେ ଆଜି ଯାଜପୁର ଜିଲ୍ଲା ଚଣ୍ଡିଖୋଲର ପ୍ରସିଦ୍ଧ ମହାବିନାୟକ ପୀଠ ସେବାୟତମାନେ ଘଣ୍ଟ ବଜାଇ ପ୍ରତିବାଦ କରିଛନ୍ତି । ମହାବିନାୟକ ମନ୍ଦିରର ଶତାଧିକ ସେବାୟତ ଏଠାରେ ପୂଜାର୍ଚ୍ଚନା କରି ପରିବାର ପ୍ରତିପୋଷଣ କରୁଥିଲେ । ଏହି ମନ୍ଦିରକୁ ପ୍ରତିଦିନ ଶହ ଶହ ଶ୍ରଦ୍ଧାଳୁ ପୂଜା କରିବାକୁ ଆସିଥାନ୍ତି। ବର୍ତ୍ତମାନ କୋଭିଡ୍ କଟକଣା ଯୋଗୁ ଶ୍ରଦ୍ଧାଳୁ ଆସୁନାହାନ୍ତି। ଫଳରେ ମନ୍ଦିର ବେଢ଼ା ଶୂନଶାନ। ସେବାୟତମାନେ ଆର୍ଥିକ ଅନଟନରେ ରହିଛନ୍ତି।