ନୂଆଖାଇ ପାଇଁ ବଲାଙ୍ଗିରରେ ନବାନ୍ନ ଲଗ୍ନ ଧାର୍ଯ୍ୟ

ବଲାଙ୍ଗିର(ବଡ଼ ଖବର ବ୍ୟୁରୋ):   ପଶ୍ଚିମ ଓଡ଼ିଶାର ଗଣପର୍ବ ନୂଆଖାଇ ପାଳନ ପାଇଁ ବଲାଙ୍ଗିର ଜିଲ୍ଲାରେ ନବାନ୍ନ ଲଗ୍ନ ନିର୍ଦ୍ଧାରଣ କରାଯାଇଛି। ଆସନ୍ତା ଭାଦ୍ରବ ଶୁକ୍ଳ ପଞ୍ଚମୀ, ଅର୍ଥାତ୍ ସେପ୍ଟେମ୍ବର ୧୫ ତାରିଖ (ମଙ୍ଗଳବାର) ସକାଳ ୯ଟା ୩୬ ମିନିଟରୁ ୧୦ଟା ୧୦ ମିନିଟ ମଧ୍ୟରେ ନବାନ୍ନ ଅର୍ପଣ ପାଇଁ ଶୁଭ ସମୟ ଧାର୍ୟ୍ୟ କରାଯାଇଛି। ନିର୍ଦ୍ଧାରିତ ଲଗ୍ନରେ ପ୍ରଥମେ ଇଷ୍ଟଦେବ-ଇଷ୍ଟଦେବୀଙ୍କ ନିକଟରେ ନୂଆ ଧାନର ଅନ୍ନ ଅର୍ପଣ କରାଯିବ। ଏହାପରେ ପରମ୍ପରା ଅନୁଯାୟୀ ବଲାଙ୍ଗିର ଜିଲ୍ଲାବାସୀ ନୂଆ ଅନ୍ନ ଗ୍ରହଣ କରି ନୂଆଖାଇ ପର୍ବ ପାଳନ କରିବେ। ରାଜ ପୁରୋହିତ ସନ୍ତୋଷ କୁମାର ଦାସଙ୍କ ସୂଚନା ଅନୁଯାୟୀ, ଶୈଳଶ୍ରୀ ପ୍ୟାଲେସରେ ଆୟୋଜିତ ବୈଠକରେ ବିଶିଷ୍ଟ ଜ୍ୟୋତିର୍ବିଦ ଓ ପଣ୍ଡିତ ମହାସଭାର ସଦସ୍ୟମାନଙ୍କ ଉପସ୍ଥିତିରେ ପଞ୍ଜିକା ଅନୁଧ୍ୟାନ କରି ଏହି ଶୁଭ ଲଗ୍ନ ଚୂଡ଼ାନ୍ତ କରାଯାଇଛି। ଏହା ସହ ନୂଆଖାଇ ପାଳନକୁ ନେଇ ଜିଲ୍ଲାବାସୀଙ୍କ ମଧ୍ୟରେ ଉତ୍ସାହ ଓ ପ୍ରସ୍ତୁତି ଜୋରଦାର ହୋଇଛି।