ନାବାଳିକାକୁ ଦୁଷ୍କର୍ମ ପରେ ହତ୍ୟା ମାମଲାରେ ରାୟ ଶୁଣାଇଛନ୍ତି ପକ୍ସୋ କୋର୍ଟ

କୋଇଡା (ବଡ଼ ଖବର ବ୍ୟୁରୋ): ସୁନ୍ଦରଗଡ଼ ପକସୋ କୋର୍ଟ ଶୁଣାଇଲେ ଐତିହାସିକ ରାୟ । ଦୁଷ୍କର୍ମକାରୀକୁ ଫାଶୀ ଦଣ୍ଡାଦେଶ ଦେଲେ କୋର୍ଟ । ୨୦୧୬ରେ ସୁନ୍ଦରଗଡ ଟାଉନଥାନା ଅଞ୍ଚଳରେ ଜଣେ ୪ ବର୍ଷର ଶିଶୁ କନ୍ୟାକୁ ଅପହରଣ କରି ଦୁଷ୍କର୍ମ ପରେ ହତ୍ୟା ମାମଲାର ରାୟ ଆସିଛି । ଆଉ ଦୋଷୀକୁ ଫାଶୀ ଦଣ୍ଡାଦେଶ ଶୁଣାଇଛନ୍ତି ପକ୍ସୋ କୋର୍ଟ । ମଣିଷ ନୁହେଁ, ମଣିଷ ରୂପରେ ସଇତାନ । ସୁନ୍ଦରଗଡ଼ ଟାଉନ ଥାନା ଦେଙ୍ଗିଭାଡ଼ି ଅଞ୍ଚଳରେ ରାତିରେ ମାଆ ପାଖରେ ଶୋଇଥିବା ୪ ବର୍ଷ ବୟସର ଶିଶୁକନ୍ୟାକୁ ଉଠାଇ ନେଇଥିଲା ସଂଜୀବ । ଆଉ ତା’ପରେ ଯାହା ହୋଇଥିଲା, ତାହା ଥିଲା ଅତ୍ୟନ୍ତ ହୃଦୟ ବିଦାରକ, ଯାହାକୁ ଶବ୍ଦରେ ବର୍ଣ୍ଣନା କରିବା କଷ୍ଟ ।

କୁନିଝିଅକୁ ଅପହରଣ କରି ଏକ ନିର୍ମାଣଧୀନ କୋଠାରେ ଦୁଷ୍କର୍ମ କରିଥିଲା ସଇତାନ ସଂଜୀବ । କେବଳ ସେତିକି ନୁହେଁ, ଅତି ନିର୍ମମ ଭାବେ ତାକୁ ହତ୍ୟା କରିବାକୁ ପଛାଇ ନଥିଲା ଜହ୍ଲାଦ । ଝିଅର ଅପହରଣ ନେଇ ନାବାଳିକାର ମାଆ ଲିଖିତ ଭାବେ ଟାଉନ ଥାନାରେ ଜଣାଇଥିଲେ । ଘଟଣାର ୩ ଦିନ ପରେ ସେହି ଅଞ୍ଚଳର ଏକ ନବ ନିର୍ମିତ ଘରୁ ଉକ୍ତ ନାବାଲିକାର ମୃତ ଦେହ ଠାବ କରାଯାଇଥିଲା, ତଦନ୍ତ କାଳରେ ନାବାଳିକାଙ୍କୁ ଦୁଷ୍କର୍ମ ହୋଇଥିବା ପୋଲିସ ଜାଣିପାରିବା ସହ ଘଟଣାର ମୁଖ୍ୟ ଅଭିଯୁକ୍ତ ସଂଜୀବ କେରକେଟାକୁ ଗିରଫ କରି କୋର୍ଟ ଚାଲାଣ କରିଥିଲା ପୋଲିସ । ଏହି ମାମଲାରେ କୋର୍ଟ ୩୫ ଜଣଙ୍କର ସାକ୍ଷ୍ୟ ନେବା ସହ ଦୁଷ୍କର୍ମକାରୀକୁ ଫାଶୀ ଦଣ୍ଡାଦେଶ ଶୁଣାଇଛନ୍ତି।