ଦୁର୍ଘଟଣାରେ ଲିଭିଗଲା ଗୋଟିଏ ପରିବାରର ୩ ଜୀବନ ଦୀପ

ବଲାଙ୍ଗିର (ବଡ଼ ଖବର ବ୍ୟୁରୋ): ବଲାଙ୍ଗିର ତୁଷୁରାରେ ମର୍ମନ୍ତୁଦ ସଡ଼କ ଦୁର୍ଘଟଣା । ତୁଷୁରା କ୍ରେନ ଧକ୍କାରେ ୩ଜଣଙ୍କ ମୃତ୍ୟୁ ଘଟଣା ମନରୁ ଲିଭି ନଥିବା ବେଳେ ପୁଣି ଘଟିଛି ଆଉ ଏକ ଦୁର୍ଘଟଣା । ବାଇକକୁ ବଲେରୋ ଧକ୍କା ଦେବାରୁ ବାପା ଓ ତାଙ୍କ ତିନି ବର୍ଷର ପୁଅର ଜୀବନ ଚାଲିଯାଇଛି । ଅନ୍ୟପଟେ ଗୁରୁତର ଅବସ୍ଥାରେ ଜୀବନ ମୃତ୍ୟୁ ସହ ସଂଗ୍ରାମ କରୁଛନ୍ତି ମା-ପୁଅ । କଳାହାଣ୍ଡି ଜିଲ୍ଲା କରଳାମୁଣ୍ଡା ବ୍ଲକ ରିଷିଡ଼ା ଗାଁର ଜଣେ ବ୍ୟକ୍ତି ସ୍ତ୍ରୀଙ୍କ ସହ ଦୁଇ ପୁଅକୁ ଧରି ତୁଷୁରାରୁ ଏକ ବାଇକ ଯୋଗେ ଘରକୁ ଫେରୁଥିବା ସମୟରେ ଜମେଲ ଛକ ନିକଟରେ ତାଙ୍କୁ ଏକ ବଲେରୋ ଗାଡ଼ି ଧକ୍କା ଦେଇଥିଲା । ଏହାଫଳରେ ଘଟଣା ସ୍ଥଳରେ ବାଇକରେ ନିଆଁ ଲାଗିଯାଇଥିଲା । ଘଟଣାସ୍ଥଳରେ ବାପା ଓ ତିନି ବର୍ଷର ଶିଶୁ ପୁତ୍ରଙ୍କ ମୃତ୍ୟୁ ହୋଇଥିବା ବେଳେ ମା ଏବଂ ଏକ ବର୍ଷର ପୁତ୍ର ଗୁରୁତର ଆହତ ହୋଇ ତାଙ୍କୁ ତୁଷୁରା ଡାକ୍ତରଖାନାରେ ଭର୍ତ୍ତି କରାଯାଇଛି । ଖବର ପାଇ ତୁଷୁରା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହିତ ତଦନ୍ତ ଆରମ୍ଭ କରିଛି ।