ସରକାରଙ୍କୁ ନରସିଂହ ଝଟକା, ବିଧାନସଭାରେ ସ୍ୱାଧିକାର ନୋଟିସ୍

ଭୁବନେଶ୍ୱର (ବଡ଼ ଖବର ବ୍ୟୁରୋ):  ନବ ଦାସ ହତ୍ୟା ପ୍ରସଙ୍ଗରେ ଗୋଟିଏପଟେ ବିଜେଡିକୁ ଘେରୁଛି ବିଜେପି । ଅନ୍ୟପଟେ ଆଇନକାନୁନର କଥା ଦେଖାଇ ସରକାରଙ୍କୁ ଅକଳରେ ପକାଉଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର । ଏଥର ନରସିଂହ ବିଧାନସଭାରେ ମୁଖ୍ୟମନ୍ତ୍ରୀଙ୍କ ବିରୋଧରେ ଆଣିଛନ୍ତି ସ୍ୱାଧୀକାର ଭଙ୍ଗ ନୋଟିସ୍ । ମୁଖ୍ୟମନ୍ତ୍ରୀଙ୍କ ସହ ଗୃହରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରାଙ୍କ ବିରୋଧରେ ମଧ୍ୟ ଅଭିଯୋଗ ଆଣିଛନ୍ତି ।

ନରସିଂହ ନୋଟିସରେ ଦର୍ଶାଇଛନ୍ତି, ମୁଖ୍ୟମନ୍ତ୍ରୀ ଓ ଗୃହରାଷ୍ଟ୍ର ମନ୍ତ୍ରୀ ବିଧାନସଭାରେ ବିଭ୍ରାନ୍ତିକର ତଥ୍ୟ ରଖିଛନ୍ତି । ନବ ଦାସ ହତ୍ୟା ତଦନ୍ତରେ ଜଷ୍ଟିସ ଜେ.ପି ଦାସଙ୍କ ଅନୁଧ୍ୟାନକୁ କୋର୍ଟ ମନିଟରଡ ବୋଲି ଗୃହରେ କୁହାଯାଇଥିଲା । କିନ୍ତୁ ଏହା ଅସତ୍ୟ ବୋଲି ନରସିଂହ କହିଛନ୍ତି । ଏ ପ୍ରସଙ୍ଗରେ ବାଚସ୍ପତି ବିକ୍ରମ କେଶରୀ ଆରୁଖ କହିଛନ୍ତି, ନୋଟିସ ମିଳିଛି ଓ ଏହାର ଅନୁଧ୍ୟାନ କରାଯାଉଛି ।