ବାରମ୍ବାର ଅଭିଯୋଗ ପରେ ଷ୍ଟେସନ ସାମ୍ନାରୁ ହଟିଲା ଚିରା ଜାତୀୟ ପତାକା
ଭୁବନେଶ୍ବର(ବଡ଼ ଖବର ବ୍ୟୁରୋ): ବାରମ୍ବାର ଅଭିଯୋଗ ପରେ ବି ଜାତୀୟ ପତାକାକୁ ଠିକ୍ ସମ୍ମାନ ଦେଉନାହାନ୍ତି ଭାରତୀୟ ରେଳ କର୍ତ୍ତୃପକ୍ଷ । ୫ ଦିନ ତଳେ ଭୁବନେଶ୍ବର ରେଳ ଷ୍ଟେସନରେ ଲାଗିଥିବା ଜାତୀୟ ପତାକାଟି ଚିରିଯାଇଥିବା ଅଭିଯୋଗ ହୋଇଥିଲା । ଜଣେ ଭାରତୀୟ ନାଗରିକ ଭାବେ ନିଜର ସୋସିଆଲ ମିଡିଆ ଆକାଉଣ୍ଟରେ ଟ୍ବିଟ କରି ରେଳ କର୍ତ୍ତୃପକ୍ଷଙ୍କୁ ସୂଚାଇଥିଲେ ଯାଜପୁରର ସମାଜସେବୀ ରଜତ କୁମାର ପତି । ମାତ୍ର ୫ ଦିନ ପରେ ଜାତୀୟ ପତକା ପରିବର୍ତ୍ତନ କରିନଥିଲେ ।
ଯାହାଫଳରେ ଏହାକୁ ପରିବର୍ତ୍ତନ କରାଇବା ପାଇଁ ଦାବି ରଖି ଧାରଣାରେ ବସିଥିଲେ ଆଭିଯୋଗକାରୀ ରଜତ । ପାଖାପାଖି ୨ଘଣ୍ଟା ଧାରଣା ପରେ ବିଭାଗ ପକ୍ଷରୁ ଜାତୀୟ ପତାକା ପରିବର୍ତ୍ତନ କରାଯାଇଛି । ହେଲେ ବିଭାଗୀୟ ଅଧିକାରୀ ତାଙ୍କ ପାଖରେ ପତାକା ଚିରିଥିବା ନେଇ କୌଣସି ସୂଚନା ନଥିବା ନିଜ ପ୍ରତିକ୍ରିୟାରେ କହିଛନ୍ତି । ମାତ୍ର ଅଭିଯୋଗକାରୀଙ୍କ ଟ୍ବିଟ ପରେ ପରେ ହିଁ ବିଭାଗ ପକ୍ଷରୁ ତାଙ୍କୁ ଫୋନ୍ ଯୋଗେ ପତାକା ପରିବର୍ତ୍ତନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ ।
ତେଣୁ ଏଥିରୁ ସ୍ପଷ୍ଟ ଯେ ବିଭାଗୀୟ ଅଧିକାରୀ ନିଜର କାର୍ଯ୍ୟ ଠିକ୍ ଭାବରେ ସମ୍ପାଦନ କରୁନାହାନ୍ତି । ଭାରତୀୟ ଧ୍ୱଜ ସଂହିତା ନିୟମ ଅନୁସାରେ ଚିରି ଯାଇଥିବା କିମ୍ବା ଫାଟି ଯାଇଥିବା ଜାତୀୟ ପତାକାକୁ ଉଡ଼ାଯିବା ଉଚିତ ନୁହେଁ ଏବଂ ଏହାକୁ ପରିବର୍ତ୍ତନ କରାଯିବା ଆବଶ୍ୟକ । ମାତ୍ର ରେଳ ବିଭାଗର ଉଦାସୀନ ମନୋଭବ ଯୋଗୁଁ ବାରମ୍ବାର ଅସମ୍ମାନିତ ହେଉଛି ଜାତୀୟ ପତକା । ତେଣୁ ଏଥିପ୍ରତି ରେଳ ବିଭାଗ ତତ୍ପରତା ପ୍ରକାଶ କରିବା ଆବଶ୍ୟକ ବୋଲି କହିଛନ୍ତି ରଜତ ।