ଆମ୍ବେଦକରଙ୍କ ସବୁଠୁ ଉଚ୍ଚା ପ୍ରତିମୂର୍ତ୍ତି ଅନାବରଣ କରିବେ କେସିଆର

ତେଲେଙ୍ଗାନା (ବଡ଼ ଖବର ବ୍ୟୁରୋ):  ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଆଜି ବିଆର ଆମ୍ବେଦକରଙ୍କ ୧୨୫ ଫୁଟ ଉଚ୍ଚତାର ପ୍ରତିମୂର୍ତ୍ତି ଅନାବରଣ କରିବେ । ସମ୍ବିଧାନ ପ୍ରଣେତା ଆମ୍ବେଦକରଙ୍କ ଜୟନ୍ତୀରେ ଏହାକୁ ଉନ୍ମୋଚନ କରାଯିବ । ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ଯାହାକୁ ନେଇ କେସିଆର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଥିଲେ । ପ୍ରତିମୂର୍ତ୍ତି ଅନାବରଣ ବେଳେ ହେଲିକପ୍ଟରରୁ ପୁଷ୍ପବୃଷ୍ଟି କରାଯିବା ନେଇ ନିଷ୍ପତ୍ତି ନିଆଯାଇଛି ।

୨୦୧୬ ଆମ୍ବେଦକରଙ୍କ ୧୨୫ତମ ଜୟନ୍ତୀ ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଏକ ବିଶେଷ ଘୋଷଣା କରିଥିଲେ । ସଚିବାଳୟକୁ ଲାଗିଥିବା ଏନଟିଆର ଗାର୍ଡେନ୍ସ ଠାରେ ୧୨୫ ଫୁଟ ଉଚ୍ଚତା ବିଶିଷ୍ଟ ଆମ୍ବେଦକରଙ୍କ ପ୍ରତିମୂର୍ତ୍ତି ସ୍ଥାପନ କରିବେ ବୋଲି ସେ କହିଥିଲେ । ଏହି ପ୍ରକଳ୍ପ ପାଇଁ ୧୪୬.୫୦ କୋଟି ଟଙ୍କା ଖର୍ଚ୍ଚ ହେବା ନେଇ ଆକଳନ ହୋଇଥିଲା ।