ଉତ୍କଳ ଦିବସରେ ବି ଆନ୍ଧ୍ରର ଦାଦାଗିରି, ଆମେ ଆଉ କେବେ ଚେତିବା?

ଭୁବନେଶ୍ୱର(ବଡ଼ ଖବର ବ୍ୟୁରୋ): ଗଲା କିଛି ବର୍ଷ ହେଲା ଓଡ଼ିଶା ସୀମାରେ ଆନ୍ଧ୍ର ଦାଦାଗିରି କରୁଛି । ଏ ସମ୍ପର୍କରେ ‘ବଡ଼ ଖବର’ ଜନ୍ମ ହେବା ଦିନ ଠାରୁ ସ୍ୱର ଉଠାଇ ଆସୁଛି । ଓଡ଼ିଶାର ନାଗରିକମାନଙ୍କୁ ଆନ୍ଧ୍ରର ଦାଦାଗିରି ସମ୍ପର୍କରେ ଖବର ମାଧ୍ୟମରେ ଜଣାଉଛି ଓ ସଚେତନ ମଧ୍ୟ କରୁଛି । ତେବେ ଏ ସମ୍ପର୍କରେ ଓଡ଼ିଶା ଯେତିକି ଗମ୍ଭୀରତାର ସହ ପଦକ୍ଷେପ ନେବା କଥା ତାହା ନେଇପାରିନାହିଁ । ସେଥିପାଇଁ ଆନ୍ଧ୍ରର ଦାଦାଗିରି ଓ ମନୋବଳ ଦିନକୁ ଦିନ ବଢ଼ିବାରେ ଲାଗିଛି ।

ସ୍ଥିତି ଏଭଳି ହୋଇଛି ଉତ୍କଳ ଦିବସ ଭଳି ଦିନରେ ବି ଓଡ଼ିଶା ସୀମା ଭିତରକୁ ଅନୁପ୍ରବେଶ କରିବାକୁ ଆନ୍ଧ୍ର ପଛାଉନାହିଁ । ଆନ୍ଧ୍ର ଅଧିକାରୀଙ୍କ ପାଖରେ ଖବର ଅଛି ଆଜି ଉତ୍କଳ ଦିବସ ବା ଓଡ଼ିଶା ପ୍ରତିଷ୍ଠା ଦିବସ । ଏପରିକି ଜଣେ କେନ୍ଦ୍ରମନ୍ତ୍ରୀ ସେଠାରେ ଉତ୍କଳ ଦିବସ ପାଳନ କରିବାକୁ ଆସିଛନ୍ତି । ତାହା ସତ୍ତ୍ୱେ ସେମାନଙ୍କ ସାହସକୁ ଦେଖନ୍ତୁ, ଏଭଳି ଦିନରେ ବି ଓଡ଼ିଶା ସୀମା ଭିତରେ ପଶି ଦାଦାଗିରି କରିବାକୁ ଚାହୁଁଛନ୍ତି । ଯାହା ଦର୍ଶାଉଛି କୋଟିଆରେ ସ୍ଥିତି ସଙ୍ଗୀନ ହୋଇଛି । କୋଟିଆରେ ଓଡ଼ିଶାର ସ୍ଥିତି ଦୁର୍ବଳ କରିବାକୁ ଆନ୍ଧ୍ର ଲଗାତାର ଚେଷ୍ଟା ଜାରି ରଖିଛି ।

 ଆନ୍ଧ୍ରର ଦାଦାଗିରିକୁ ହାଲକାରେ ନିଆଯାଇପାରିବ ନାହିଁ । ଏହା ଭବିଷ୍ୟତ ପାଇଁ ଏକ ସତର୍କ ଘଣ୍ଟି । ଏବେଠୁ ଯଦି ଓଡ଼ିଶା ସଜାଗ ନହେବ, ଆନ୍ଧ୍ରକୁ ମୁହଁତୋଡ଼ ଜବାବ ନଦେବ, ଆଉ ନିଜ ସୀମାକୁ ସୁରକ୍ଷା ନ କରିବ, ତାହାହେଲେ ନେଡ଼ି ଗୁଡ଼ କହୁଣୀକୁ ବୋହିଯିବ । ପ୍ରଥମ ଦିନରୁ ‘ବଡ଼ ଖବର’ ଏହି କଥା କହି ଆସୁଛି ।

 ଉତ୍କଳ ଦିବସ ଭଳି ଦିନରେ ବି ଖବର ମାଧ୍ୟମରେ ରାଜ୍ୟବାସୀଙ୍କୁ ଆମେ ଆହ୍ୱାନ ଦେବା ପାଇଁ ଚାହୁଁଛୁ । ଆମ ସୀମାକୁ ସୁରକ୍ଷା ଦେବାକୁ ହେବ । ପଡ଼ୋଶୀ ରାଜ୍ୟର ମନମାନିକୁ ବରଦାସ୍ତ କରାଯିବ ନାହିଁ । ପୂର୍ବରୁ ଅଖଣ୍ଡ ଓଡ଼ିଶା ଖଣ୍ଡବିଖଣ୍ଡିତ ହୋଇସାରିଛି । ଷଢ଼େଇକଳା, ଖରସୁଆଁ ଭଳି ଓଡ଼ିଶାର ଅଭିନ୍ନ ଅଙ୍ଗ ପଡ଼ୋଶୀ ହାତକୁ ଯାଇସାରିଛି । ଆଉ ଓଡ଼ିଶାର ଅଧିକ କ୍ଷତି ନହେଉ । ଆମେ ଯଦି ଆମ ସୀମାକୁ ସୁରକ୍ଷା ଦେଇ ନପାରିବା ଆମ ପରପିଢ଼ି କେବେବି ଆମକୁ କ୍ଷମା କରିବେ ନାହିଁ ।