ବିଜେପିରେ ମିଶିଲେ ଅଞ୍ଜଳି

ଢେଙ୍କାନାଳ (ବଡ଼ ଖବର ବ୍ୟୁରୋ): ଢେଙ୍କାନାଳ ଜିଲ୍ଲା ହିନ୍ଦୋଳ ବିଧାନସଭା ନିର୍ବାଚନମଣ୍ଡଳୀର ପୂର୍ବତନ ବିଧାୟିକା ତଥା ପୂର୍ବତନ ମନ୍ତ୍ରୀ ଅଞ୍ଜଳି ବେହେରା ଭାଜପାରେ ମିଶିଲେ। ସୋମବାର ଭୁବନେଶ୍ୱର ସ୍ଥିତ ରାଜ୍ୟ ଭାଜପା କାର୍ଯ୍ୟାଳୟରେ  ଆୟୋଜିତ ମିଶ୍ରଣ ପର୍ବରେ ନିଜ ସମର୍ଥକଙ୍କ ସହିତ ଯୋଗଦେବେ ବୋଲି ରବିବାର ଫୋନ ଯୋଗେ ସୂଚନା ଦେଇଥିଲେ ।

ଭାଜପାରେ ସାମିଲ ହେବା ପରେ ଦଳର ନିର୍ଦ୍ଦେଶ ହେଲେ ଆସନ୍ତା ପଞ୍ଚାୟତ ନିର୍ବାଚନରେ ଦଳୀୟ ପ୍ରାର୍ଥୀଙ୍କ ପାଇଁ କାର୍ଯ୍ୟ କରିବେ ବୋଲି କହିଛନ୍ତି । ହିନ୍ଦୋଳ ବିଧାନସଭା ଆସନରୁ ବିଜେଡି ପକ୍ଷରୁ ପ୍ରତିଦ୍ୱନ୍ଦିତା କରି ୨୦୦୦,୨୦୦୪ ଏବଂ ୨୦୦୯ରେ ଲଗାତାର ୩ ଥର ବିଧାୟିକା ଭାବେ ଜିତିଥିଲେ ଅଞ୍ଜଳି । ଏହା ସହ ୨ ଥର ମନ୍ତ୍ରୀ ମଧ୍ୟ ରହିଥିଲେ । ପରବର୍ତ୍ତୀ ସମୟରେ ଦଳ ବିରୋଧି କାର୍ଯ୍ୟ ପାଇଁ ତାଙ୍କୁ ବିଜେଡିରୁ ନିଲମ୍ବିତ କରାଯାଇଥିଲା ।