ସିବିଆଇଠୁ ଭଲ କ୍ରାଇମବ୍ରାଞ୍ଚ: ଅରୁଣ
ବଡ଼ ଖବର(ଭୁବନେଶ୍ୱର ବ୍ୟୁରୋ): ନବ ଦାସ ହତ୍ୟା ଘଟଣାରେ ସଂଧ୍ୟା ସମୟରେ ବିଧାନସଭାରେ ହୋଇଛି ସରଗରମ ଆଲୋଚନା । ମୁଲତବି ପ୍ରସ୍ତାବ ଆଲୋଚନାରେ ଭାଗ ନେଇ ବିଜେଡି ବିଧାୟକ ଅରୁଣ ସାହୁ ବିରୋଧୀଙ୍କୁ ତୀବ୍ର ନିନ୍ଦା କରିଛନ୍ତି । ସେ କହିଛନ୍ତି, ଏକ ସାମାନ୍ୟ ମୃତ୍ୟୁ ସମସ୍ତଙ୍କୁ ଦୁଃଖ ଦିଏ । ଅମାନୁଷିକ ହତ୍ୟା ହୃଦୟ ବିଦାରକ । ଜଘନ୍ୟ ହତ୍ୟାକାଣ୍ଡକୁ କେହି ପସନ୍ଦ କରିବେନି । ସମସ୍ତଙ୍କୁ ଦୁଃଖ ଦିଏ । ନବ ଦାସଙ୍କ ହତ୍ୟାକୁ ନେଇ ଗୃହ ଏବଂ ଗୃହ ବାହାରେ ଆଲୋଚନା ହେଉଛି । ତଥ୍ୟ ନାହିଁ, ସତ୍ୟ ନାହିଁ । ଚାହା ଖଟିରେ ଗପ ଭଳି ଲାଗୁଛି । ଅବାନ୍ତର ଆଲୋଚନାକୁ କେତେଦୂର ବିଶ୍ୱାସ କରାଯାଇପାରେ ଓଡ଼ିଶାବାସୀ ବିଚାର କରିବେ ବୋଲି ବିଜେଡି ନେତା ଅରୁଣ ସାହୁ କହିଛନ୍ତି ।
ଆପୋଲୋ ହସ୍ପିଟାଲରେ ନବ ଦାସଙ୍କୁ ମୁଖ୍ୟମନ୍ତ୍ରୀ ମୁଣ୍ଡିଆ ମାରିବା ଅର୍ଥ, ଠାକୁରଙ୍କୁ ଡାକୁଥିଲେ । ଜୀବନ ବଞ୍ଚାଇବା ପାଇଁ ପ୍ରାର୍ଥନା କରୁଥିଲେ । ନବ ଦାସଙ୍କ ଶୁଦ୍ଧିକ୍ରିୟା ସରି ନଥିବାବେଳେ ଯେଉଁ ଭଳି ବୟନବାଜି କରାଗଲା ତାହା ସମସ୍ତଙ୍କୁ ବ୍ୟଥିତ କରୁଛି । ସରକାର ତଦନ୍ତରେ ଏଫବିଆଇର ସହଯୋଗ ନେବାକୁ ଚାହିଁଛନ୍ତି । ସିବିଆଇ ଯେଉଁ ପ୍ରକ୍ରିୟାରେ ତଦନ୍ତ କରେ, କ୍ରାଇମବ୍ରାଞ୍ଚ ମଧ୍ୟ ସେହି ପ୍ରକ୍ରିୟା ଆପଣାଉଛି । ବିରୋଧୀଙ୍କ ପାଖରେ ଯାହା ତଥ୍ୟ ଏବଂ ପ୍ରମାଣ ଅଛି କ୍ରାଇମବ୍ରାଞ୍ଚକୁ ଦିଅନ୍ତୁ ବୋଲି ଅରୁଣ କହିଛନ୍ତି । ସେ କହିଛନ୍ତି ସିବିଆଇଠୁ ବହୁତ ଭଲ କ୍ରାଇମବ୍ରାଞ୍ଚ । ନବୀନ ପଟ୍ଟନାୟକ ବହୁତ ସମ୍ବେଦନଶୀଳ । ଦୋଷୀକୁ କଠୋର ଦଣ୍ଡ ଦିଅନ୍ତି । ବିରୋଧୀ ଧୈର୍ଯ୍ୟ ଧରନ୍ତୁ, ଅପେକ୍ଷା କରନ୍ତୁ, ତଦନ୍ତ ରିପୋର୍ଟକୁ ।