ବିଜେପୁର ବିଜେପି ପ୍ରାର୍ଥୀକୁ ବିରୋଧ କଲେ ଦଳୀୟ କର୍ମକର୍ତ୍ତା

ଅତାବିରା (ବଡ଼ ଖବର ବ୍ୟୁରୋ): ବରଗଡ଼ ଲୋକସଭା କ୍ଷେତ୍ର ଅଧିନସ୍ଥ ବିଜେପୁର ବିଧାନସଭା ନିର୍ବାଚନମଣ୍ଡଳି ପାଇଁ ତିନି ପ୍ରମୁଖ ଦଳ ବିଜେପି, ବିଜେଡି ଓ କଂଗ୍ରେସ ପକ୍ଷରୁ ନିଜ ନିଜ ପ୍ରାର୍ଥୀ ଘୋଷଣା ହୋଇସାରିଛି । ବିଜେପିରୁ ସନତ୍ ଗଡତିୟା, କଂଗ୍ରେସରୁ କିଶୋର ଦଫାଦାରଙ୍କୁ ପ୍ରାର୍ଥୀ କରିଥିବା ବେଳେ ବିଜେଡି ମନ୍ତ୍ରୀ ରୀତା ସାହୁଙ୍କୁ ପୁଣି ଥରେ ପ୍ରାର୍ଥୀ କରିଛି । ତେବେ ବିଜେପୁର ନିର୍ବାଚନମଣ୍ଡଳିରେ ବିଜେପି ପ୍ରାର୍ଥୀ ସନତ ଗଡତିୟାଙ୍କ ପ୍ରତି ବିରୋଧାଭାସ ବଢ଼ିବାକୁ ଲାଗିଛି ।

କିଛି ଦିନ ତଳେ ଆଶାୟୀ ସୁଶୀଲ ଶର୍ମାଙ୍କ ସମର୍ଥକମାନେ ଭୁବନେଶ୍ୱର ବିଜେପି ଅଫିସ ଯାଇ ସେଠାରେ ସନତଙ୍କ ପ୍ରାର୍ଥୀତ୍ୱକୁ ନେଇ ବିରୋଧ କରି ସୁଶୀଲଙ୍କୁ ଟିକେଟ ଦେବାକୁ ଦାବି କରିଥିଲେ । ପୁଣି କେତେକ କର୍ମୀ ସନତଙ୍କୁ ବଦଳାଇ ସୁରେନ୍ଦ୍ର ପାତ୍ରଙ୍କୁ ଟିକେଟ ଦାବି କରୁଥିବା ବେଳେ ଗତ କାଲି ସନ୍ଧ୍ୟାରେ ବରପାଲି ଓ ବିଜେପୁର ବ୍ଳକର ଶତାଧିକ କର୍ମକର୍ତ୍ତାମାନେ ବରଗଡ଼ ବିଜେପି ଅଫିସକୁ ଆସି ବିରୋଧ କରିଥିଲେ । ସେମାନେ ସନତ ଗଡତିୟାଙ୍କୁ ଖୋଲାଖୋଲି ବିରୋଧ କରୁଥିବା ବେଳେ ତାଙ୍କ ବଦଳରେ ରବି ନାରାୟଣ ଦାସଙ୍କୁ ପ୍ରାର୍ଥୀ କରିବାକୁ ଦାବି କରିଥିଲେ ।

ସେମାନେ ପ୍ରାର୍ଥୀ ଚୟନ ପ୍ରକ୍ରିୟାକୁ ବିରୋଧ ସହ ଦଳରେ ନୀତି ଆଦର୍ଶ ଭଳି ଆଉ କିଛି ନ ଥିବା କର୍ମକର୍ତ୍ତାମାନେ ଅଭିଯୋଗ କରିଛନ୍ତି । ବିଜେପୁରରେ ବିଜେପି ଯଦି ପ୍ରାର୍ଥୀ ପରିବର୍ତ୍ତନ ନ କରେ ତେବେ ଦଳୀୟ କର୍ମକର୍ତ୍ତାମାନେ ଆଗକୁ ବଡ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି । ସୂଚନା ଯୋଗ୍ୟ ଯେ ପୂର୍ବରୁ ସନତ ଗଡତିୟା ଦୁଇ ଦୁଇ ଥର ପ୍ରାର୍ଥୀ ହୋଇ ୫୦ ହଜାରରୁ ଅଧିକ ଭୋଟ ବ୍ୟବଧାନରେ ପରାଜିତ ହୋଇଛନ୍ତି । ତେଣୁ ଏଥର ବିଜେପି ନୂଆଁ ଚେହେରା ସହ ରବି ନାରାୟଣ ଦାସଙ୍କୁ ପ୍ରାର୍ଥୀ କଲେ ଦଳ ବିଜୟୀ ଲାଭ କରିବା ବୋଲି ଦୃଢ଼ୋକ୍ତି କରି କହିଛନ୍ତି ।