ସ୍ୱପ୍ନରେ ଆସି କହିଲେ ରାମଲାଲା..ମୁଁ ୨୨ରେ ଅଯୋଧ୍ୟା ଆସୁନି’

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ବିହାର ପୂର୍ବତନ ମୁଖ୍ୟମନ୍ତ୍ରୀ ତଥା ଆର୍‌ଜେଡି ନେତା ଲାଲପ୍ରସାଦ ଯାଦବଙ୍କ ବଡ଼ପୁଅ ତଥା ମନ୍ତ୍ରୀ ତେଜ ପ୍ରତାପ ପୁଣି ଏକ ଅଜବ ମନ୍ତବ୍ୟ ଦେଇଛନ୍ତି। ପ୍ରଭୁ ରାମ ଜାନୁୟାରୀ ୨୨ରେ ଅଯୋଧ୍ୟାରେ ଆୟୋଜିତ ହେବାକୁ ଥିବା ଶ୍ରୀ ରାମ ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମକୁ ଆସୁନାହାନ୍ତି। ମୋତେ ଏକ ସ୍ୱପ୍ନ ହୋଇଛି ଯେ, ପ୍ରଭୁ ରାମ ଭାରତୀୟ ଜନତା ଦଳର ଏହି ରାଜନୈତିକ କାର୍ଯ୍ୟକ୍ରମକୁ ଆସୁନାହାନ୍ତି। ଯାହାକୁ ନେଇ ରାଜନୀତି ଜୋର ଧରିଛି।

ପ୍ରାଣ ପ୍ରତିଷ୍ଠା ଉତ୍ସବକୁ ନେଇ ତେଜ ପ୍ରତାପ ଯାଦବ କହିଛନ୍ତି, ଯେତେବେଳେ ନିର୍ବାଚନ ଆସୁଛି, ସେତେବେଳେ ମନ୍ଦିର କଥା ମନେ ପଡ଼ୁଛି। ଆଉ ନିର୍ବାଚନ ସରିଗଲେ ମନ୍ଦିର କଥା ଭୁଲି ଯାଉଛନ୍ତି। ଇଏ କ’ଣ ଜରୁରୀ ଜାନୁଆରୀ ୨୨ ତାରିଖରେ ଶ୍ରୀରାମ ଆଯୋଧ୍ୟା ଆସିବେ? ମୁଁ କହୁଛି ସେଦିନ ରାମଜୀ ଆସିବେ ନାହିଁ। ରାମଜୀ ସ୍ୱପ୍ନରେ ଆସି ମୋତେ କହିଛନ୍ତି। ନିଜ ସଙ୍ଗଠନର କର୍ମକର୍ତ୍ତାଙ୍କୁ ଉଦ୍‌ବୋଧନ ଦେଲା ବେଳେ ସେ ଏପରି କହିଛନ୍ତି।