ବଗଲା ପାଇଁ ପଦଯାତ୍ରା

ପୁରୀ (ବଡ଼ ଖବର ବ୍ୟୁରୋ): ବଗଲା ଧର୍ମଶାଳାକୁ ନେଇ ବିଜେପି ରାସ୍ତାକୁ ଓହ୍ଲାଇଛି । ବଗଲାକୁ ନେଇ ବିଜେପି ଆରମ୍ଭ କରିଛି ପଦଯାତ୍ରା । ଆଜି ସକାଳ ୯ଟାରୁ ସିଂହଦ୍ୱାରଠାରୁ ଭୁବନେଶ୍ୱର ନବୀନ ନିବାସ ପର୍ଯ୍ୟନ୍ତ ବିଜେପି ପକ୍ଷରୁ ଆରମ୍ଭ ହୋଇଛି ପଦଯାତ୍ରା । ପୂର୍ବରୁ ଧର୍ମଶାଳା ଜମି ବିକ୍ରିକୁ ନେଇ ପୁରୀ ବିଜେପି ତରଫରୁ ୨୭ଦିନ ଧାରଣା ଦିଆଯାଇଥିଲା । ପ୍ରଶାସନ ପକ୍ଷରୁ କୌଣସି ଆଲୋଚନା ହେବା ଦୂରର କଥା ଘଟଣାସ୍ଥଳକୁ କୌଣସି ଅଧିକାରୀ ଆସିଲେ ନାହିଁ । ଏଣୁ ବିଜେପି ପକ୍ଷରୁ ରାଜ୍ୟ ମୁଖିଆଙ୍କୁ ଜଣାଇବାକୁ ଏହି ପଦଯାତ୍ରା କରାଯାଉଛି ବୋଲି ବିଜେପି ପକ୍ଷରୁ କୁହାଯାଇଛି । ଏହା ବ୍ୟତୀତ ପୁରୀ ଜିଲ୍ଲା ମୁଖ୍ୟ ଡାକ୍ତରଖାନାକୁ ଲାଗି ରହିଥିବା ପୁରୁଣା ଜେଲକୁ ଡାକ୍ତରଖାନା ସହ ମିଶାଇବାକୁ ଦାବିପତ୍ର ପ୍ରଦାନ କରାଯିବ ବୋଲି କୁହାଯାଇଛି । ଏହି ପଦଯାତ୍ରାରେ ପୁରୀ ବିଧାୟକ ଜୟନ୍ତ ଷଡଙ୍ଗୀ, ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ବିଜେପି ଜିଲ୍ଲା ସଭାପତି ଆଶ୍ରିତ ପଟ୍ଟନାୟକଙ୍କ ସମେତ ବହୁ ଦଳୀୟ କାର୍ଯ୍ୟକର୍ତ୍ତା ସାମିଲ୍ ହୋଇଛନ୍ତି ।