ହଜିଯାଉଛି ଶୈଶବ

ବାଲିଆପାଳ, (ବଡ଼ ଖବର ବ୍ୟୁରୋ): ଖେଳିବା, ବୁଲିବା ବୟସରେ ବିଛଣାରେ ପଡ଼ିରହିଛି ମନୋଜ । ପାଟିରୁ ବାହାରୁନି ଦରୋଟି କଥା । କେବଳ ବଲ ବଲ ହୋଇ ଚାହିୁଁଛି । ଏଭଳି କରୁଣ ଦୃଶ୍ୟ ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ୍ ଅନ୍ତର୍ଗତ ଶ୍ରାରାମପୁର ପଞ୍ଚାୟତର ଧାନନ୍ଦା ଗ୍ରାମରେ । ଅର୍ଥ ଅଭାବରୁ ୩ବର୍ଷର ମାନସିକ ଅନଗ୍ରସର ପିଲାର ଚିକିତ୍ସାରେ ବାଧକ ସାଜିଛି। ଏହି କଅଁଳ ପିଲାର ଭବିଷ୍ୟତ ଅନିଶ୍ଚିତ ଆଡ଼କୁ ଠେଲି ହୋଇଯାଇଛି।

ଧାନନ୍ଦା ଗ୍ରାମର ଜଗନ୍ନାଥ ଦଳାଇଙ୍କ ପୁଅ ମନୋଜ ଦଳାଇ । ବୟସ ମାତ୍ର ୩ । ସେ ଜନ୍ମରୁ ମାନସିକ ଓ ଶାରୀରିକ ବିକଳାଙ୍ଗ । ଆଜି ପର୍ୟ୍ୟନ୍ତ ଚାଲିବା ଦୂରର କଥା ବସି ମଧ୍ୟ ପାରୁନାହିଁ। ଜଗନ୍ନାଥ ଜଣେ ଦିନ ମଜୁରିଆ । ପୁଅର ଚିକିତ୍ସା ପାଇଁ ଦରକାର ହେଉଥିବା ଟଙ୍କା ଯୋଗାଡ଼ କରିବାରେ ଅସମର୍ଥ । ଯେତିକି ରୋଜଗାର କରନ୍ତି, ଘର ଚଳିବାକୁ ନିଅଁଣ୍ଟ। ଡାକ୍ତରଙ୍କ କହିବା ଅନୁଯାୟୀ ପିଲାକୁ ଯଦି ଏବେଠାରୁ ଉନ୍ନତମାନର ଚିକିତ୍ସା କରାଯାଏ ତେବେ ସଂପୂର୍ଣ୍ଣ ସୁସ୍ଥ ହେବାର ସମ୍ଭାବନା ରହିଛି। ତେଣୁ ମନୋଜର ଚିକିତ୍ସାରେ ସହଯୋଗ ପାଇଁ ବାପା ଜଗନ୍ନାଥ, ମା’ ଅମ୍ବିକା, ଗ୍ରାମବାସୀ ସରକାର ଓ ସହୃଦୟ ବ୍ୟକ୍ତିମାନେ ସହଯୋଗର ହାତ ବଢ଼ାଇବା ପାଇଁ ନିବେଦନ କରିଛନ୍ତି।